Tallano Gold

Sa akong pagmata,

sa daklit, nabuta ko

dihang namugos og lusot

ang silaw sa adlaw, lahos

sa nag kang-a'ng bintana.

Nagdamgo man gud ko

nga gitanyagan ko og daw

usa ka kumo ka dako

nga bulawan, nga sa akong kahakog

akong gium-om kay

basi og makawat pa sa uban.

Subo akong niadto sa abuhan,

nagpabukal og kape nga hinimo

sa sinanlag nga bugas,

ug nagsugba og malalangsi

nga buwad nga isuwa sa init pa

nga linung-ag nga mais.

Hapit mapaso ang akong alingag-ngag

sa dihang gi-inom ko ang pait nga kape!

Abi man gud nako ang kahayag,

gikan sa bulawan nagkidlap-kidlap

nga gisaw-an sa kabuntagon

Dakong ilad man diay ang Tallano Gold!

12/30/2021

Volunteerism

Walay kwarta nga makapalit ug makapadanlog sa konsensya ug esperito sa volunteerism, Mao kana ang pwersa nga nagpauswag sa pakigbisog ni Leni kontra sa mga higanteng pwersa. Walay mausik nga mumho sa tawong gutom sa kausaban

 

Ang Agakay

 

Gihapuhap sa bidlisiw sa kabuntagon

ang lim-aw nga gitalikdan sa kagabhi-on

Akong naaninaw ang ugmang gawasnon

nga gihimugso niadtong kaadlawon

Nga ikaw gabalisa sa kasakit og pagsulay

apan wala ka natarog kay Dios ang imong agakay

Sa kinatumyan sa imong pag-antos,

nabuskad ang pagla-om nga mihupay sa kahapdos

Padayona, agaka ang imong kasingkasing

hapuhapa ang kaniadtong subo mong aping

Anam-anami og halad ang damgo mong tinipigan,

pangita-a na lang unya ako didto sa pantaw nga karaan

Didto sa kagabhi-on modalikyat sama sa aninipot

nga salin sa nagkatibula-ag nga mga bito-on

haiku

wa nay kadasig ~

ang sawumsom gituhop

sa kagabhi-on

"A traditional Japanese haiku is a three-line poem with seventeen syllables, written in a 5/7/5 syllable count. Often focusing on images from nature, haiku emphasizes simplicity, intensity, and directness of expression"

Nag-ul-ol kining akong kasingkasing

(Balak nga mugna ni Telet Montiel Achay Amba)

Higala kong Manghuhukom Ric Bastasa

sa imong pagtaliwan milalin ka,

nag-una ka ngadto sa langit,

kami imong gibiyaan ning kalibutan

puno sa kalisod, kalisdanan, kakulian.

kagul-anan, gibilin mo kanamo

kining mga kasakit nga hilabihan

Adyos higala kong Manghuhukom,

maayong paglatas tadlas sa kapunawpunawan

dalha si covid ngadto sa kapanganuran

aron wala nay matakboyan.

Delete sent Today at 6:49 PM

Hubad sa balak ni Ric Bastasa , "How can I ever be"

Naunsa man nga sa makadyot
nakong pagkapaykapay 
kalit lang nahanaw
sa inyong handurawan
nga walay badlis
sa nagsikot-sikot nga gumunhap
sa kapritso sa tawo,
sa awhag sa natagamtaman nga kaagi,
sa mga sulagmang pagbati sa gugma

Ngano nga ako usa lang ka alibangbang
sa inyong panumduman

Hilom Ang Imong Katapusang Panamilit Higala Judge Ric Bastasa

Nanglaylay ang akong mga bukton
dihang nabatyagan ko ang ga-an nga tunob sa talithi.
Wala ko panumbalinga higala ang imong abiso.
Gitahak ko ang bantulihaw nga lang-at —
mga kasubo ug pagbakho sa kahilom,
mga yagubyob sa silaba sa tak-om nga baba,
mga bakak nga gidalit ko sa akong kaugalingon 
mga salin sa pasumbingay nga makapahinuklog ug
mga adlaw sa pagpakaaron-ingnon nga kalipay.
Sihag ang akong kagahapon diha kanimo, kabahin kaniya
apan wala mo makita ang alang kanimo

Gibaliwala ko  ang ga-an nga tunob sa talithi
nahimong suba ang sapa nga nag dungkal sa akong konsensya.
lima ka tu-ig nga pagpakahilom sa mga silaba
apan buka ang akong mga mata nga nagdamgo

Ubay-ubay sila nga imong natandog —
mga garay sa kalipay ug kasakit,
mga lisod tugkaron nga mga sunanoy,
libo-libong lumalabay nga mga sugilanon,
mga minug-nang kamaya ug tinipigang kangutngot,
mga kakapoy sa mga bakak ug pagtakuban

Sa paghikalimot, namasin ko og luna sa kagawasan ug kalipay
apan wala ko damha nga ang ga-an nga tunob sa talithi
usa diay ka dakong unos sa kinapusoran.

 

RIP Ric

 Padayon sa pag byahe 
higala kong Judge Ric Bastasa
Naa kana karon sa lugar 
nga wala nay kasakit 

You will be missed ...

Hawla

Dili tanang hawla hinimo sa puthaw

susama sa hawla sa kagahapon,

hawla sa kawad-on,

hawla sa sayop nga pagtu-o

ug mga latos sa makatol nga dila

sa masusihon ug mabiay-biayon

Wala ako mag-inusara,

daghan kita nga nanaglangoy

sa dagat nga walay tubig,

gikulitog sa konsensya

nga gisuhop sa sementadong salog

Nagkadaiyang bulok nga nanuktok

sa pultahan sa kura paroko,

nagdanguy-ngoy nga tik-om ang ngabil,

nagpamasin sa pasaylo ug himaya

sa nagkirat-kirat nga bombilya sa grasya

Unsay silbi sa garbo sa pagkaadunahan?

garbo sa kaalam ug kaanyag?

hubo kita nga misulod, hubo upod

kita nga mopa-uli

6-20-21

Adlaw sa mga Amahan

Bisan unsaon og lugnot

sa iyang tanlag

kay gusto na og kagawasan

ning "adlaw sa mga amahan",

apan lawom ang iyang

gamot nga niturok

gikan sa lapa-lapa lahos sa iyang

kasing-kasing nga puno

sa kagahapon

Hayag kuno ang ugma

sa mga gitanyagan

og lantip nga pangutok

apan doble man hino-on

ang kaha-it niini nga mihiwa

sa iyang tanlag

Mga dalan nga nanag-ikis

sa tuwapos nga libod-suroy

nga nangita og kabantog

taliwala sa mga matang

hilabtanon, ug mga dilang

nagdiwal-wal sa mga irong

gutom

Masanagon ang adlaw sa masuso

apan blanko ang kaugmaon

sa nagpasad nga bukog

sa handuraw sa mga pughaw

na og panan-aw

Ang amahan kuno susama

sa adlaw nga sigi nimong makita

nga atong gibaliwala,

apan dulom di-ay ang kalibutan

kon siya mawala

Poetry in progress ...Padayon

Galubid-lubid ang agas sa kabanha

sa hugaw nga tubig sa mabaw'ng sapa,

sama sa gatuyok-tuyok nga asoy ni mang Kanor

alingisig nga tingog sa yupi'ng tambor

Yagpis ang bati-is sa luya niyang lakang

apan ang kamala sa iyang tila-ok walay giblang,

dugo lamang ang makahatag og kapiskay

inubanan sa suporta sa masa nga nagbuhagay

Dihang nibalukot na ang gahom sa kangitngit,

naka uniporme'ng mga kikik, gatingsi ug nanag-agik-ik

ang kuno nga mga adik, kalit lang nilugapak

nibuhagay nga dugo nga sa yuta nikuyanap

Sa sabakan sa kamatayon ilang gibakwi

konsensyang gipalit lamang sa bantal nga salapi,

espiritu sa katawhan daw salamin nga nangapusgay

kalayo sa impyerno, ka satanas nangindahay

Pagkaugma giladlad na ang ilang ngalan

napatik sa mantalaan nga kasagaran binayaran,

aslom ug pait ang awit sa hustesya

mga letrang itom ang tenta sa iyang linya

Ang panabot nila, susama sa masuso nga iyang gihadla

kolokomedya lang daw, alamag sa galamhan nga gamala,

nagbangutan ang mga pobreng hingtungdan

pagbalik-balik og bilar, mao nay naandan

Lintunganay sa prinsipyo daw aso nga nawagtang

gihulipan sa kasuko nga walay igong basihan,

bala-od nga gitagik sa pinilo nga mga tu-ig

kawang ang mga titik, nga sa tunghaan gialig-ig

Gisukod ko ang panganod sa akong mga tudlo

apan lagkit ang kalikupan sa akong mga mulo,

ang kagawasan sama lamang sa lumalabay nga hangin

dili mahuptan sa palad sa nagdilaab kong nga mithi

Sa pipila ka tuig akong gibansay-bansay

ang naglagiting nga abiso sa mga hamugaway,

ang kinabuhi kuno dili usikan kay mubo lamang

kalas sa oras ang pagsanggi sa salin sa kamaisan

Kon ugaling man sa kinabuhi kami hikabsan

aninawa unya ninyo ang hayag nga tingog sa bulan,

dili pwedeng iareglo ang kuko sa hustesya

sama sa busay, lanog unya ang iyang paghagsa

Ang liderato sama lang sa mini nga sensilyo

ilis-ilis nga sa-ad sa mga bulingong trapo

pabalik-balik nga mga pulong nga walay unod

alang sa mga pobreng tuwapos nga andam motamod

Gitadlas sa mga anghel ang abugong dalan

nakighinabi sa mga pungkol og utok nga ilang naagi-an,

apan padayon gihapon ang paglutaw sa utok-bolinaw

ang pakasad-on mao man hino-on ang nalamdagan sa adlaw

Ang hustesya sama sa gutom nga iro nga libod-suroy

nanaghot sa mga walay puangod gamit ang mga sonanoy

ang nakadungog sa nataran, nanagtikhing nga nanago

daw mga pawikan nga nikuyamang, balik sa balay nanagbakho

Gi-andam ang kawa sa mga martir nga nagpasakit

gisugnoran sa dugo ug luha ang sinako nga kangit-ngit

ang kan-on, saw-an sa tanan, apil ang wala nagmahay

asa inyong tanlag? mga pari ug mga maalamon ilang gipamatay

Haom sa basiyo kong bukag ang paglaom nga nasamdan

nga sukad-masukad daw basura nga inyong gibiya-an,

gisindihan ko ug kapungot and akong mga pag-antos

gisabod sa mga kasingkasing nga nahimong nang anu-os

Nilagapak ang ulan sa atop kong busluton

dayag ang siak, sukad pa sa pipila ka kagahapon,

gisalod ko ang tinulo sa balde nga hinatag ni tatay

kay lagi kuno kiriwan ang tentasyon ug mga pagsulay

sumpayan pa ....

3/16/21

covid

 ang lawas naningil na karon

busa sa gusto nimog sa dili

mopahulay ka gayod

makaigwad kas kainit

maghurong hurong ang imong 

panglantaw

ang kanhiay nga hait nga panglantaw

karon pondol na

karon mokaon ka bisag walay gana

kapoyon kag kinatulog

sakit ang imong likod dayon mag-abot

na ang imong gininhawa

anaa pa gihapon ang pangutana

kon naapil ka ba sa gicovid karong adlawa

unsa ug usan?

 gihipos mo ang

daghan kaayong

salapi, para unsa?

gipanghatag ko

ang akong tinaguan,

ana ang para usan.

paris

 gipapili ka 

diha sa pagpuyo

nga malinawon,

ok ka lang kaha?

dili magdungan

ang kalinaw ug

kalipay, pili ka.

gipili mo ang

kalinaw, milayas

ang kalipay.

magsoon ang 

kalipay       ug

kagubot, magparis

ang kasakit ug

kahilom.

para usan

 hagkan ang liog

suroy sa dila gikan

sa abaga hangtod sa

kiting, piyong ang

mata, gihandom ang

mga nawala na.

kamot

 kumo nga kamot

giablihan, kamot nga

hayang, giisa sa langit,

walay sulod, gialsa ang

karaang hangin.

90

 gusto kuno niyang mamatay

apan sa talad kan-anan sigig

pangutana kon unsay iyang

unahon ug kaon: inun-unan 

ba kaha o adobong baboy?

nalimtan

 unta gisulat ko 

na lang, aron dili malimtan

kabahin kadto sa kalipay

kaadlawon kadto

gidaman ko bahin nimo

dunay nagawsan.

dili mahurot

 sa mga duol unta kaayo

apan dili nato mahikap

sa mga anaa ra sa tungod

apan dili nato matilawan

sa mga nahawiran na unta

apan nakaikyas pa gayod 

tungod sa kadanlog tungog

usab sa kahadlok

sa mga gitubdan sa atong laway

sa  mga gikahiyakan sa atong tiyan

sa mga gibaloran sa atong mga pus-on

sa tanang nga pagkaihion

salamat na lang, salamat,

kay naa pay ugma, dili mahurot

ang galambi mo nga ngabil

 pasiplat kog tutok nimo

samtang nagkaon kag saging

naglambi man diay ang imong

ngabil

dili kaayo pula, apan hinog,

unta kon akong matilawan pag-usab

mas lamian, kaha?

hatsing

 ang kasubo mangitag kuyog

seguro kon mas daghan, sama sa paglakaw

ug pagsuroy-suroy diha magsugod ang kabibo

unya kon mokaylap na ang kabibo

diha na dayon moabot ang 

paghikalimot nga gipangita natong tanan

aron himamaton.

ang kasakit mas sakit kon ikaw lang usa

sa imong lawak naa rag tutok sa kisame

nga dili makamaong motutok ug balik nimo

mas maayo nga ikuyog mo ang imong iring

diha sa imong ilokan

dugang sa kainit sa imong naghagong nga kabugnaw

mogawas ang ulo niini, gustong moikyas gikan nimo

nga kon imong pahugtan, molugput kini, dawag kawras

aron ka pasakitan ug dugang aron

maamgohan nimo nga sayop ang imong binuhatan

ayaw isulod sa imong purol

basin mas masakitan ka sa imong iring nga misamot ka itom

tungod sa kapungot nimo

moingon nga nakakita niining hitaboa

manugilon nga ang imoha dakong grasya

mas dako pa sa iring nga itom

mas itomon pa sa itom

iyang itago ang kalahian, ang kahumok sa balahibo sa

iring, nga makahatag nimog pipila ka mga hatsing.

pakigsandurot sa tiki nga milamoy sa nahisalaag nga langaw

pagkaabtik sa tiki nga nagpuyo sa ilalom sa akong personal computer.

naglisod kog patay gamit ang swatter sa langaw nga nahisalaag diring dapita.

mi give-up ko

 unya sa dihang mitugdong ang maong langaw sa ibabaw sa sound speaker kalit lang mitumaw ang tiki unya sa walay langay gilamoy ang langaw,

 dayon samtang busog na kini kaayo nagtinutukay ming duha nga puno sa kalipay ang among mga kasingkasing

dako man diay ang iyang mga mata

morag mata sa dinosaur kon tutukan

nakahinumdom ko sa Lament ni anton chechov, 

dili ba god nga sa tumang kaguol niya

nakig-estorya na man gani siya sa iyang kabayo samtang siging kahulog ang snow didto dapit sa iyang giyak-an

matingala ka kon duna bay

connection ang langaw, ang tiki,  ako nga buhi,

si anton ug ang iyang kabayo nga puros na patay

actually, duna.

ikaw ang among connection

dako baya kaayo ang imong kalabotan

bisag wala pa kita bisag kausa pa

nagkita

pangagho

 dili kuno mingaw ang

pag-inosara, gani kon maandan

mo na kini, mingawon ka niini,

mingawon? dili ba kon mingawon

ka, angkonon mo una ang kamingaw?

bakakon, gikahadlokan mo ang

pagbuswak, busa nagpabilin ka sa

kapit-os diha sa pyuos, hugot ang

imong kahimtang, piot, giunsa mo

kaha ang paginhawa?

mingaw ang kamingaw, labaw na

ang pag-inosara, apan saon taman

mora ka mga bata nga nagtago

lang gihapons sa ilaloms a katre

bisag wala na ang imong amahan

nga mibunal kanimo sa iyang bakos.

moginhawa ako ug lalom sa paghandom

nga matugkad ko ang kalalom sa imong

kamingaw, nga atong gitabontabonan sa

mga pangagho diha sa bugnaw na kaayo

nga kagabhion.

unta kitang duha, dili kabuhion, hawid lang

sa hukot nga pisi diri sa atong mga baligkawang

oops, ayaw diha sa liog, kay hikog na kana

sa balaang tikog nga gikitkit sa buyog nga walay liog.

kabuang

 may nailaila ako nga babaye

nga nanganti, nga sa nadawat 

niyang grasya ug kalipay ang

nahitabo, wala na siyay kabutangan

niining tanan  busa iya kining

gihinginlan ug gipapauli sagol

sa pag-ingon, " wala na kamoy 

pulos kanako? panglayas kamo!"

gipakisama kini niya sa iyang

refrigerator, nga puno na sa mga

ilimnon ug mga pagkaon, ug

sa dihang dunay miabot nga 

letson, nilat-ang baka, biko,

leche flan, ug uban pa, iya kining

gipauli sa mga nanghatag, kay lagi

wala nay kasudlan sa iyang kagwang.