sa dihang nawa ka na

wala ko na nasimhot
ang kahumot sa adobong baboy
wala na mitubo pa ang
siopao
ang mga misetera sa gawas
sa balay
sa kilid sa mga bintana
og sa pader
walay mga buwak
mingaw kaayong pamation ang
kahilom sa mga kahoy nga
wala nay mga dahon
ang mga kapayas sa kilid sa labat
kalit lang nga nangalata ang
mga gamot
dayon nilag kahapla
sa gauga nga yuta

gipangutana ko ang
kamanghoran mong anak
dayon niyag pasumangil
sa hukom sa langit