Sirkiro

Kab-ota ang kalisdanan nga naglutaw-lutaw
Kurata ang mga kalimutaw sa mananan-aw

Lupad sa duyog sa kulba ug ayaw palamat
Kay ang oras baya imong dublihon og inat

Kon ikaw masayup tulisan ka sa kagubot
Kawatan ka kon ikaw mahagbong kadiyut

Apan ang kaguliyang kuyog sa kalampusan
Ang paghagbong dili lang salag sa kalingawan
Ang tanang pakpak sa sirko tungod sa kakugihan

Lubog

Kining akong gugma dong, usa ka lubog nga sapa.
Kini di tataw, di dayag ug adunay balabag.
Tuod, naa ko’y gisagol sa tubig aron kini mahanap.

Ug kon ikaw dali lang mahimuut sa imong makita,
palihug, sabta. Palihug, ayaw pod pugsa.

Ug kon di ka kasabot, palihug og sakripisyo
ug pakigbisog sa di nimo makita.

Ug kon di ka, palihug ayaw na lang ispilinga
kon ngano man gud lubog ang tubig sa sapa,
kay basin madagma pa ka sa lapuk ug mahugaw
ang imong lapa-lapa, tiil, batiis ug paa.

Hala, lakaw na lang diha ug ayaw na pakita.

candice salazar

Ang Alampat   ang alampat sama kini sa hangin, nga nagtikdol sa kalag nga migakos sa kahilom, tungod kay ang iyang himaya lumalabay lamang, imo kining hakupon pinaagi sa paghulma ug mga pulong ikwadrado mo ang iyang hulagway sa imong dughan

Tungod kanimo higala

"nipanaw ako agi sa libao'ng dalan ngadto sa kinailadman sa akong kalag ug natagak sa pangpang sa akong tanlag" apan tungod sa dan-ag sa bato diin ang imong kasing-kasing giukit, nabuntog ko ang unos sa kangitngit tungod kanimo, wala ako masunog bisan pa sa mahusgahong mga mata tungod kanimo, nahibilin akong walay samad dinhi sa panggubatan tungod kanimo, bisan ang kamatayon dili kanako makapukan...

---

Now with a new friend-happy design! Try the new Yahoo! Canada Messenger

gusto ko unta ikaw nga likayan

babaye, gusto ko unta ikaw nga likayan
og sa dayon ako ikaw nga hikalimtan

apan bisan unsaon ko man
tapot ka na man sa akong galamhan

gusto ko ikaw nga iwilik
nga murag sip-on apan wala ako'y nahimo
anaa ka man mitapot sa tumoy sa akong tarugo

babaye, giunsa mo ba ako
nga dili man ako makalimot kanimo

ania ako nagsiging tan-aw nianang kisame
anaa ang imong mga mata og aping
mokulob ako sa katre motutok sa salog
anaa ang imong mga paa og bulog

babaye, unsa bay akong sala kanimo
nganong gisilutan mo man ako

gusto ko nga matulog aron magdamgo na usab kanimo
halok sa buntag, karinyo sa undto, og sa gabii tapot sa duro.

luyaha ako, dut-i ako, tandayi ako, suyupa ako,
tilai ako, kan-a ako, tunla ako, babaye imoha na ako.

kon gusto kang mogamit sa akong kote

mahilig ka diay modula sa kote
anang gitawag nilag dula sa mga lalaki

dili dimalas ang imong pag-abot
kay ako anaay kote

sinaw, talinis ang lansang nga akong
gibutang sa tumoy niining
akong dulaan

taas kining akong kote
lig-on ang kahoy og kusog kining motalo

daghan na kinig gibuntog
nianang dula sa paitok og patuyoktuyok

gikopya ko lang ang kote sa akong papa
nga siging giselosan ni mama

kon gusto ka nga magdula sa akong kote
kuhaa lang sulod sa akong bulsa

apila ang hapos
aron dili mahilos

kagahapon naligo ako sa baybayon

i

adlaw sa pagkabanhaw
og didto ako sa baybayon

kusog ang hangin
og dagko ang mga balod

init kaayo ang adlaw
og ang baybayon baya

pagkamingaw


ii

naglingkod ako sa daplin
namati sa awit sa
baybayon
nianang bugnaw na nga
kahaponon

gubot ang akong mga buhok
basa ang akong mga tiil
og ang akong lapa-lapa
sa balod gilambalamba

iii

dili ko unta gusto ang paggamit
nianang hunahuna
nangandoy ako nga mahimong
tig-a sama sa mga bato

magpakahilom sama sa mga
kinhason
magpabaya sama sa mga omang

iv

ang mga lumot mitapot og ang
mga sisi nanaghan
nagpaabot nga ako moduol kanila

kay aron sa lumot ako madakin-as
og sa sisi ako masamad

v

misudya ang paghinay nga paglanay
sa kahayag
moabot na ang kangitngit
mawala ang akong anino
og iyang tan-awon kon unsa ang
akong buhaton
sa pagpalong unya sa tanang kahayag

karong gabhiona sa akong pag-inosara
sa daplin sa baybayon
wala ang bulan og mga bitoon

ang guma

guma ako imo day
dili kana guma inat
guma kana kasing
dili kana kasing tuyok
kasing kana dukhan

mao kana sulti insik

kasing

ilawom sa kaudtuhon
mahiligon usab ako nga makigdula

sa tansanay, kariling, tabanog, dyulin
ug bisan sa gibantog nga kasing

nga sa pag-abot sa kaudtuhon dili matulog
muambak sa bintana bisag prisuhon

dayon bitbit sa kasing padayugdog
sa dalan nga kabo-kabo diin gapaabot ang mga higala

nga nanulong ug nagbitbit sa ilang mga bag-ong
kinilutang mga mugna gipasinawan, gipa-utok ug gipatalinsan

haron sa pagsangkaay pildi ang kasing nga karagan
nga nagpatuyang sa iyang dalan.

busa nga itom

baliktos sa busa nga itom
sa simod sa baka nga nati

malisod daw gaid sa kaudtuhon
taliwala sa naglagiting nga kainit

makapagba daw kamras sa salbahis
nga kuko sa pagbasol nga naila-ila

batok sa kahayag nga mibilib sa iyang kaugalingon
ug nagtuong iya ang tanang rason

nganong namulak ug namunga ang kahoy
nga ingon pa niya nag-ambat sa iyang katahom

ug kunuhay nipasilong sa iyang mga landong
haron tidlumon ang iyang kaadunahan

maayo nalang siguro ang magpakahilom
kay walay gubot nga maangkon.

pagwahing

iwahing mo ang imong mga tiil
kay sa taliwala sa imong kangitngit
mosulod ako isip lig-on nga kahayag

dala ko usab ang sulab sa kainit
alang sa imong pagpanugnaw

mopiyong ka aron sa imong mga pilok salaon mo
ang akong mga dan-ag, ang matood og ang mga bakak

anaa sa imong kahidlaw milatag ang akong mga bangaw
pula, asul, dalag, lilac, tan-awa ang akong mga handuraw

kabahin sa mga bitoon didto sa langit

dunay nangutana nganong ang hangin
molabay man og dayon mobalik
nganong ang mga lata gihimo mang
lubnganan sa kawad-on
nganong ang panahon mopadayon

taas og lalom ang kagabhion
og dunay nakabantay
nga ang bulan naghubo
sa iyang kahayag didto sa kakugnan
nga kini walay kalainan kagahapon
mora lang gihapon

dunay misagbat nga kining
atong lawak dinhi
kaniadto ang mga hapon nagpalong og kandila
og dunay mga misayaw og nag-iyak sa kangitngit

og kita wala magduda
mitoo kita dayon sa maong sugilanon
gibati nato ang kagabhion nga walay kataposan

sa atong duol dunay laing miyubit nga  ang mga bakho natapos na
og wala nato kini mabantayi

dayon dunay misugilon
kabahin sa daghan kaayong mga  bitoon didto sa langit
ang ilang pagkahilomon ang ilang pagkalayo gayod kaayo kanato

moabot ang panahon

bisag tigulang na ta
aduna pa gihapo'y mahitabong
pag-abot sa gugma

aduna pa gihapo'y moabot nga
dan-ag sa usa ka kahayag
dili pa ulahi ang tanan moingon sila kanato

usahay sa atong pagmata
mokalit lang og siga ang suga nga mora bag
sila lang ang nagpasiga sa ilang kaugalingon

ang mga habol nimo wala damha
nakasibot og mga damgo
ang imong mga alugnan morag mga kabo
nga napuno sa kahidlaw
mangalisbo ang kahumot sa imong katre og
ang imong lawas manginit nga morag tubig nga nagbukal
bisan sa tanan nilang pagsaway
ang imong mga panit mosinaw og ang imong nga kamot
mangamay og ang imong baba
moyubit anang "dali!"

og ugma ang mga abog sa imong mga tiil
mahimong mga alibangbang

abi nako

abi nako
nga sa akong edad, diha sa tunga-tunga
sa kabatan-on og katigulang

nga daghan na ako og nasabtan
nagsalig usaha'y sa akong nabasa og nahibaw-an

apan kalit akong nahingangha
daghan pa diay akog wala nakita sa akong pagkabuta

sa lawod sa akong pagbati
lubog pa gihapon ang akong mga dagat

sa mga bukid sa pagbakho
angaton pa kaayo ang akong pagtando

sa mga patag sa kahayahay
daghan pa gihapong libaong ang akong nautingkay

mabaw pa gihapon ang akong panglantaw
og sa akong kasingkasing ako nagbugtaw

abi nako og anaa na ako sa kataposang ang-ang
pahilayo nianang mga binuang

ania, nagsugod na usab ako sa kinaubsan
naningkamot nga makasabot sa akong gidangatan

Mutuo Ka Man o Dili

ang larawan nga nakita mo
tipik sa kagahapon ko
usa ka mabulukong kaagi
sa akong kinabuhi

apan bisan pa man niadtong tanan
mga pagdayeg,mga palakpak og kadaugan
nakigbugno ko sa binuhat nga naa sa larawan
buot ko idangilag aron mosilaab og mahanaw na lang!

(bay ric, usa kadto ka larawan
nga biktima sa kawad-on og kahuyang)

seryosly speking

gusto unta nakong
ilain ang balak
kanang lahi usab
ang akong
tinood nga kinabuhi

gusto unta nakong
magmaskara diha kaninyo
aron dili ninyo makita
ang tinood nakong pagkatawo

gusto nakong manayaw ta
sa kinabuhi
kanang wala'y hawid-hawid
sa kataha
nga kon og unsa ko
balewala lang kaninyo

(tig-mind og si Heide
pa ang pasultihon)

gusto nako nga tangtangon ang
akong ngalan
og ibilin nako sa kasagbotan
aron ako makig-inom og
tuba og makigkilaw kaninyo
og mga labod

gusto nakong makigharong
kaninyo
isip matood isip tawong
masamdan og modugo

(baga og nawong
walay ulaw, unsay imong gi-enter?)

apan lahi ang dagan sa akong
panahon
mipaingon ako sa kangitngit
sa kasagbotan
sa mga taki-taki
sa kagingking

og kamo
sayod ko
naghandom pa
gihapon sa mga patag
og dan-ag sa kahayag
sa mga sagbot nga bugnaw
sa mga kahoy nga mamunga
sa mga bulak nga mobuswak
sa mga sapa nga tin-aw
sa mga ulan nga makabanhaw

managlahi ang atong dalan
masamad na ako sa kahayag sa adlaw
mapaslot na ako sa
yamog sa kabuntagon
mabuta na ako sa kaodtohon
og ang tubig init na kaayo sa akong mga panit

laksot na ang akong nawong
nangabali na ang akong mga bukog
og ang katawhan
nagpundok na og mga bato alang kanako

seryosly speking
ako ang inyong gikasilagan
ako ang nagpalayo og midagan
mitago sa kangiob didto sa akong langob
og karon ania dala ang kasubo
mitaghoy miawit

gustong motapad sa mga panganod sa langit
dawaton pa kaha ako sa bulan og sa mga bitoon?

hapit di ko katoo

hapit di ko katoo
pagtan-aw nako sa letrato

mas maanyag man
si adbent
kay ni adbento!

(sa dihang nakita nako ang
hulagway ni adbent nga nagsanina
diin mibilib si candice
sa iyang kaanyag)

erotik

kon dako ka nga dagat
gusto ko
ako ang mga balod
diha nimo

naa ko's taas
ikaw ang ubos
og sa imong mga lapyahan
ako ang magbalikbalik
nga mga dila
kay ako baya ang balod
nga motiglom
motago sa imong mga
puti nga balas

isip usa ka handoman
isip hunahuna nga bulawan

balaknon

gipangutana siya
nga kon matapos na ang kalibotan
sa usa ka makusog nga linog
diin mobuka ang yuta
og kilawon kitang tanan
sa usa ka
paglamoy sa baba
sa kalibotan

unsa man kuno'y iyang buhaton?
mamalak lang gihapon

ipsot

init kaayo
walay mga tawo
mingaw kaayo
tanan sirado

biyernes santo
katulgon ko

biernes santo

kitang mga katoliko
mahilig anang mga santo og santa

busa naay mga adlaw usab nga santo
biernes santo
lunes santo
miercoles santo
huwebes santo

pati gani ang mga parte sa atong ginoo
naay mga santo og sagrado

sagrado corazon de jesus
sagrado familia

mora bag ang tanan gayod
o bisag unsa na lang
atong himoong santos

naay santos sa pagdaro
sa regla
sa pagtoon og pagkuha og board exam
naay santos sa mga mangkoy og mangkay
naay santos sa negosyo
santos sa rosario
santos sa mga walay paglaom

ug uban pa
nga sa akong panglantaw mora bag
nawad-an na kitag salig sa atong kaugalingong pagtoo sa gahom sa diyos
busa atong ihapak ang atong kakulangon ngadto sa mga santos

busa daghang san
san miguel, san jose, san martin, san lucas, san marcos, san tilmo, san dayong,
daghang sab kaayong mga santa
santa felomina, santa barbara, santa veronica, santa luisa

dili daotan ang paghandom sa kinabuhi sa mga santos og santas
isip atong mga modelo
tungod kay milabaw sila sa ilang mga vertudes

apan kon sila na lang ang atong kanunay nga mabungat sa atong mga ngabil
nga hapit na gani mabintahaan ang tinood nga diyos
bikil na kana

mobalik kita sa usa ka diyos
nga tinood
dili na nato yabagon ang atong kaugalingon
dili na nato gubuton ang yano og tinood og kinasingkasing nga pagtoo

usa ka Diyos og ikaw ang iyang anak nga iyang gihigugma pag-ayo
kahibalo na siya sa imong huna-huna
kahibalo na siya sa imong daghang pangayoon
bisan og wala ka pa kabungat niini

hangad lang
sa hilom ayaw na og daghang yawit
dayga siya
ayaw na og hatag sa daghang pasalig

kay ang Diyos
Diyos

dili bulok, dili maulog-ulogan, dili mailad, dili hakog, dili dali masuko
dili tapolan, dili bungol, dili madinumtanon, mapasayloon, maggihatagon

og labaw sa tanan
gidawat ka niya bisag unsa ka pa

pangadye lang
pakigsulti kaniya kay siya ang imong amahan, imong amigo og imong kasaligan.

ang tanan nga nanglabaw

kon unsa ang labaw
mao kana ang imbaw

ang imbaw
nga nilabaw
ikrus

mao kana ang dula
sa kinabuhi sa bata

kon unsa ang molabaw
bisan unsa
maputlan gayod

apan dili tanang maputlan
labaw
aduna usay'y kulang nga maputlan

(sama sa kulang sa bayad sa koryente
dili ba maputlan kag suga?)

pailin-ilin sa mga katarungan
palusot-lusot sa dughan

apan atong balikan
nga kon unsa ang manglabaw
sarang gayod kunong putlan

kon molabaw na ang imong tingog
angayan nga pahinayan

kon molabaw na ang imong garbo
angaya usab nga pamub-an

hilot-hilot
aron ang piang matambalan

pauyon-uyon ginagmay
aron motam-is ang kamay

adunay nanglabaw nga atong ilabay
kay dili na kini gabay

ang kaayo og kadautan
kinahanglang igo-igo lang

mao kana ang gihanyag kanato
ni aristotle
ang pagpabilin lang diha sa tunga-tunga

dili palabian ang kaisog
dili usab palabian ang katalawan

katamtaman lang
kay diha ang atong pagkalamian

kalbaryo

siya ang kalbaryo sa iyang inahan
apan para kaniya
bisag unsay maymay
sagol sa kasaba
og pagmahay
kay siya man lang lagi ang siya
nga gidawat na niya
balewala lang ang tanan

lapos sa pikas dunggan ang gibutang
mora siyag balay nga puros bintana
og ang iyang inahan nahimong plakang guba

dedma, mao kana siya
gibuhat ang tanang gusto niya
og ang nanay nga nagpangga kunuhay
maoy naluray

namatay ang iyang inahan
og para kaniya nahimong langit ang tanan

para niya
kon nahimo siyang kalbaryo sa iyang nanay
iya na kadto
kutob ra didto

kay siya nga nahibilin
karon magpailin-ilin
kay ngano wala siya'y sigbin?

Labaw sa tanan

Sa dihang nakamatngon ug buot
nahinumduman ko pa nga aduna nay Dios

Nagdako sa pahimatngon
matagbagting sa orasyon magtawag si nanay kanamo

Dagkotan ang lamparang gamay
ibutang sa altar ug dayon kuros sa agtang,
sa baba ug sa dughan

Pag-ampo kanunay ang hingiban
bisan sa kapakyasan sa pangandoy ug katumanan

Ug bisan gani pasalamat sa tanang gidangatan
makasakit man o kaauyan sa kinabuhi

Diha'y mga pangutana ug mga pagduda
apan mas labaw ang pagsalig sa gugma niyang gipakita

Ug bisan karong aduna nay pamilya
giagda ko kanunay ang kapikas sa kuyo

Mudangop sa kahitas-an
sa tanang higayon ug labaw sa tanan
pagpasalamat sa tanang Niyang kaayo.

pagkahuman sa prusisyon niadtong gabii sa tagbo

so, mikuyog ko sa prusisuyon sa kaadlawon
nianang panagtagbo ni maria og ni Jesus

sa iyang pagkabanhaw nianang
ginagmay nga dramatization sa kinabuhi

sa atong ginoo,
recall kadyot, di ba dunay bata nga adunay

karton nga pako og balahibo nga white bondpaper
nga gibitay og miawit

isip anghel? sus gasakit baya ang hawak sa bata
kay hugot ra kaayo ang pisi

og habog ra kaayo, busa kini usab nalisang
og daghan kaayong nabilib, nindot kaayo ang show

makapanglimbawot sa balahibo kay ang awit
sa bata pagkamingaw, pagkatudling, pagkainosente

nga pamation sa akong dalunggan
gitan-aw nako ang karo nga gipatungan sa birhen

maria og ni maria veronica, nahawan ang tanang
mga bulak nga gisaknit sa mga tawo, gipangkawat

tambal kuno kini sa mga klase-klaseng sakit
og lihi kuno kini sa bulang karong domingo.

ang pagsalig

gihagit ka niya pag-ambak sa maong pangpang
kay ang imong Ginoo nga nagpangga kanimo

andam na sa ubos aron pagsalo kanimo.
ayaw dayon og too

hinumdumi, wala gani moambak si kristo.
nahiubos kaha ang mga anghel?
og duro kahang buhakhak og katawa ang mga yawa?

animal ka george!

kita nga ilang gipatoo

kita nga ilang gipatoo

nga ang yawa dali rang
makita
kay kini adunay taas nga
ikog og hait
kaayo nga sungay
og kini baho
og dunay kwaknit
ng pako
og maot og kini siya
makahadlok
kay mobugwak og
kalayo
og gadala og
bangkaw nga
tulo'y sima


kita nga ilang gipatoo

nga ang anghel adunay pako
nga ang balahibo puti
sama sa usa ka
salampati og ang iyang
nawong haskang
kagwapo kay kini
siya maamo
og kini siya kusog kaayong
molupad og andam
nga manalipod og
motabang kanato

og kita usab mitoo
ambot sa tumang kasayon kitang
tanang gayod dayong mitoo

apan kon imong sutaon gayod
lisod baya tuhuan nga ang yawa
maayo usab nga magtakuban
nga magpakaanghel

nga ako pananglitan wala pa
gayod sugod makakita anang anghel
og yawa apan aduna na ako'y
gitawag nga yawa
gitawag nga anghel

nianang ako masuko og masilag og mahiubos
nianang ako mahigugma og malamian nga mora akog gibayaw sa kapanganoran
nga mora akog nabanhaw

niadtong ako nalipay og nahikatulog og nagdamgo
nga nakita nako dili lamang ang anghel
apil na ang nawong sa Diyos.

kita nga ilang gipatoo
mitoo dayon, dili tungod kay aduna kita'y nakita
kon dili
aduna kita'y gibati

nga gikan sa kangitngit miambak kita
lakang sa usa ka dakong bung-aw sa pagduda
miambak kita sa panganod
wala na kita'y nakita

kita nga gipatoo, mitoo lang gayod dayon, bisan og wala
kita'y nakita

sakto ka, anaa lang diha ang pagsalig.

i# ang pagpugong

una ginadili ang pagkaon og daghan
tingpugong na

ikaduha ginadili ang pagpamati sa
mga music nga disco
dili maglipay kay ang Diyos
namatay

ikatulo ginadili ang pagkaligo,
og daghan pa: ginadili ang pagkaon sa karne
(barbecue, letson manok, letson baboy,
pizza nga naa'y karne, lasagna kay naay
baka nga ginaling, labi na ang hamburger)

ginadili ang pagsayawsayaw
mainsultuhan ang mama mary og papa joseph
gilutos baya si jesus
gilansang siya sa krus

2# ang pagpalusot

sulod sa kwarto
kaon og todo
patokar sa i-pod
tuplok sa i-phone
surf sa internet

tan-aw sa tv
naa pa ang wowowie
ukab sa lap top
surf, surf, chat,
busy sa email


(hayy!!! unsaon na lang
kining atong pagkatawo!)

God knows na lay mahibalo!!!

sa pagpamati sa siete palabras diri sa amoa

sa tinood lang
wala pa'y naghagit kanako nga mohubad niaanang
usa sa mga
sieta palabras

o bisan og ila kong tahasan
mobalibad sab ko dayon

lahi ra man god ang akong madungog
matag diskorso sa mga
hanas og mga banggiitan

malibog ko usahay nganong
isyagit man jud
ang atong paghinuklog

bungol ba ang Diyos nga gilansang sa krus?
gahi ba og ulo ang iyang mga katawhan?

mas nindot baya unta og
ibutyag ang tanan
sama sa usa ka hunghong sa usa ka
mapinanggaon nga inahan

og sa usa ka amahan
nga nagmaymay sa anak kay kini
iyang gihigugma
bisan og makasasala

kon inyo akong tagaan og higayon
sa paghubad sa usa sa mga pulong nianang sieta palabras

gusto nako
pinaagi sa balak lamang
sayod ko

wala man usa'y ganahang mamati


init kaayo ang panahon
guba ang electric fan sa simbahan
og wala kadala og paypay
ang mga manay.

ang wala nako masabti hangtod karon

kabahin ni Kristo. daghan pa gihapon ako og
wala masabti,

kinsa ba siya sa gamay pa siya nga bata,
kinsa ba ang iyang kadula,
unsa ba ang ilang dula
asa ba siya nagdula?

sa iyang pagka-ulitawo na
asa ba siya niadtong panahona?
kinsa ba ang iyang uyab?
nanguyab ba pod kaha siya?

aduna ba usab siya'y gibati sa pag-usob
sa iyang lawas? aduna ba usab siya'y kaibog
sa mga babaye? (o kaha ba sa mga lalaki?)

ayaw kabalaka, pangutana ra gani ning ako.
ayaw kasuko, balaan lagi gayod siya.

basin baya og ato lang kining mga huna-huna
apan kon tinood gayod siya nga tawo, nan

basin baya og sama kanako, aduna usab ako'y
mga balatian, nga kon imo akong pangutan-on

tungod kay ako usab kining pangkaugalingon lamang
(privacy ba) dili ko gayod usab kini isugilon kanimo.

labi na nga dili ako Diyos. Tawo lang ako og sama
kanimo, aduna ako'y katungod sa pagtago sa angay

lang gayod kanako.

O! nganong nagmug-ot man ka diha?

sa akong pagkakatoliko

daghan na nga namantay sa akong pagkakatoliko
wala na ang adlaw-adlaw nga pagsimba

morag nawala na ang salig sa pagkalawat
apil na ang gimando nga pagkompisal

nawad-an na kuno ako og pagsalig sa Diyos
nawala na ang akong pagtoo isip kristiyano

dili nako mabasol ang pari nga nangawat
dili ako maghisgot nianang mga pari nga adunay

mga anak og mga babaye nga migamit lang gihapon
sa ilang mga apelyedo bisan og ang ilang uyab unta

mga ulitawo man (kay ang pari dili baya minyo)
dili nako ipamahid ang akong mga sayop sa uban

kay ako lang kana, o ako ang manubag niana.
apan kon atong tukion ang kamatooran ang

pagtoo wala baya diha sa mga ritwal sama nianang
mga pagpangurus nga morag masamad na ang atong

mga agtang, sama nianang pagpunay og luhod, tindog,
lingkod, og kulang na lang mohapa sa sugo nianang mga

relihiyoso. Dili baya nianang pagpunay og tulon sa ostias og
pag-amen sa mga kaparian. Dili baya nianang pagpaka-

aron-ingnon, sama sa dako kaayong letra sa imong ngalan
isip kinadak-an og amot sa simbahan og pagpalakas nimo

sa mga kaobispohan, sa pagka-aktibo sa mga kalihokan.
Ang pagtoo man god, anaa sa sulod sa atong dughan.

Sulayi kuno og pagpuyo nga mag-inosara didto sa bungtod
diin lisod ang tubig og ang pagkaon, diin ikaw mabasa sa ulan

diin ikaw mapandol sa mga bato, diin ikaw matunok, diin
ikaw mahadlok, diin ang kabugnaw sa kagabhion dili matam-

balan sa habol, diin ang imong mga pulong mobalik diha kanimo,
diin ang imong kaestorya mao lamang ang bukid og kakahoyan.

sayon lang ang paghunahuna nga ikaw nagbasol og nangayog pasaylo.
lisod baya ang pagbuhat, lisod baya gayod ang atong pagpakakristyano.

sa semana santa

sa paghubad unya sa pito ka pulong
andamon ko na ang akong kaugalingon

adunay moiyagak nga morag baka nga giihaw
adunay maosyagit nga morag gitusok sa bangkaw

anaa na usab ang mga balaan nagpurongpurong
anaa na usab ang mga hipokritong nagyubit sa pulong

maglingkod lang ako sa kilid, magpamati, molantaw
maniid, mamantay, mosanding, matulog aron mabanhaw

Pasaylua ako, Nagbasol ako

Kinsa ba ako nga maghisgot
Kabahin sa Imong kaayo kanako

Kinsa ba ako nga magsugilon
Sa Imong pag-agak kanako

Wala ako'y igong katakos
Daw sa naamang dinhi taliwala
Sa Imong katawhan

Nagpakabuta sa mga panghitabo
Gilup-itan ang konsinsya ug gitago

Nisalom sa lunangan sa pagpakasala
Bisan sa dakong kasayuran nagmatig-a

Apan nagbasol ako
Sa pagtubay sa hadla sa tentasyon

Nagbasol nganong nagpaanod
Sa bul-og sa kaligutgot ug kasilag

Wala pamalandungi ang imong pasaylo
Nga gipadagayday dinha ibabaw sa krus

Sa krus nga naglansang kanimo
Gumikan sa akong pagkamakasasala

Pagkamadinumtanon, pagkamasupilon
pagkatawhanon, bisan luyo sa imong paggiya

Pasaylua ako, Nagbasol ako,
Hugasi ang akong pagkamasasala

Hunari ang kabahong sa akong pagdumot
Ug tul-ira ako sa akong pagkamasupilon

Gibasulan ko na ang tanan
Andam na akong mupadayag sa akong nasaksihan

Puy-an ang imong mga pagtulun-an
Ug buntugon sa maka-usa ang agni sa pagkatawhanon

Bisan ilansang susama kanimo
Dawaton ko sa walay pupanuko.

Akong Krus

Kining krus nga gipas-an ko
Ihatod ko usab kini didto sa kalbaryo
Madusmo man sa makatulo o kanapulo
Sagubangon ko kini og itaroy unya didto
Ipalanog ko ang akong mga inagulo
Mga pagbasol, pangaliya, kasakit og kasubo.

Kini maoy krus nga akong gipili
Bug-at man apan maoy hagit sa kinabuhi
Bisan og mahait nga lansang kanako nagpaabot
Palapson ko kini sa kaunoran kong gapyasot
Og sa pag-alim unya niini sa umaabot
Lig-on pa sa kanhing gialsang krus ako nanghinaot.

Tinughong

Lusang puti nga busloton
Sa tayang dugay nang nikaon
Sa sartin nga gama sa latang pinikpik
Haron mahulmang bahawan.

Gipuno og baga nga gikan sa linung-ag
Nga kan-ong binungkagan--
Lutong mais nga bag-ong ginaling
Sa batong lingin ni Tatay
Nga tua na sa laing kalibotan.

Pagkatam-is sa gisabawng tubig
Sa linung-ag nga bag-ong haon
Aron matughong hulip
Sa tiyan nga nagkutoy.

Mitubod akong luha,
Misawom sa pina-ig mga mais
Nga akong gisuwa, giparis

Sa kaling nga binagahan
Nga sa kahumot nanilingan.

Gipangandoy ang wala diha.
Kada tulon lad-ok sa dagkong lusok
Sa bugas nga gahapon pa nahagdaw
Sa bag-ong luna nga gisanggian.

Kanus-a pa matilawan ang matuod
Nga pamahaw'g paniudto?
Sagdi nalang ang panihapon.
Pwede ra nang damgohon.

Ang Balay sa Bungtod

Bati,
Guba,
Tulo ug
Gabok na.

Layo,
Mingaw,
Taliwala
Sa kamaisan pa.

Karaan,
Kabilin,
Sa kanhi mong
Katigulangan.

Mahimong
Puluy-anan
Sa umaabot mo
Ug kaugmaon.

Bisan pa
Ako mukuyog
Sa imong payag
Sa bungtod
Sa Cancainap.

Ikalipay ko
Antuson
Mga kasakit
Buntugon.

Didto
Atong buhion
Ug tukuron
Ang pamilyang
Lig-on.

Labyog sa tangse sa hunasan sa Cancainap

Paghilam pa lang sa mubong kamot
sa orasan sa alas singko sa kaadlawon,
luyo sa katugnaw ug katulugon
mobakod ang akong bayaw nga
si Kapitan--gibantog sa iyang kahingigo
sa pagpanglabyog og tamala
sa among baryo sa Cancainap.

Bitbit ang tangsi sumpay sa gitas-on

sa iyang pailob. Gihigtan kini og paon

ug gipuwawan sa gilibon nga kandilang

tinunaw hulip sa bangag nga pinuy-anan
sa aninikad nga mao unyay molingaw

pag-agni sa mga tamalang gigusla

sa ilang pagsuroy-suroy.

Tangsing gibilibod sa kaltek nga kabo

ug sudlanan sa mahimong bunga unya

sa iyang pagpanglabyog.

Wala'y laing mahimo. Wala'y buhatan

gawas sa giuwang sa baybay ug lawod.

Wala'y laing paugnat gawas sa pagtuyok

ug paglabyog sa tangse paingon

sa pangandoyng tukbon ang tubag

sa nagkutoy nga tiyan.

Wala panumbalinga ang katugnaw

sa kaadlawon ug ang kamras

sa kaudtuhon. Wala igsapayan

nga mapagtong ug mabudlay

sa pagbaklay taliwala sa dagat
nga nag-awas kanunay sa singot

ug sugilanong matuod sa kaparat.

walay kumo sa pag-antos

ingon sa iyang Nanay kinahanglang mag-antos
kay naa ra'y panahon nga kita mangasantos

og tuod kini si Inday Letecia
mituman sa tambag ni Nanay Sema

tuon sa buntag, tuon sa gabii
kon makabasa sus pagkapwerti

kay kuno ang kinabuhi dili makuha sa swerti
kon dili anaa gayod sa tiunay nga mga kakugi

adunay mga lalom nga gabii og sayong kaadlawon
gihumol sa tubig ni Letecia ang mga tiil kay magtoon

gipanghimakak ang katulugon
naghago pati na sa kaodtohon

miabot ang panahon kunuhay
sa pag-ani sa mga pagbudlay

kalooy ba ni Inday Letecia
nabuang ra man og iyaha!

nianang pagpahilayo usahay

nianang pagpahilayo usahay
diha nato makita ang wala pa nato makita

kay kon dug-ol ra kaayo ang atong dughan
ato lamang mabati ang pitik
sa kasingkasing

og ang kainit sa mga bukton
og katam-is sa mga ngabil

sa pagpunay og piyong nabutaan kitang duha
og wala na kita'y makita nga kamatooran

dia ako diri sa ubos ug anaa ikaw sa taas
lagyo ang atong mga gitindogan

nakita ko ang bungtod nga nagharag
nakita nimo ang patag nga yabag.

pasyon

lisod sabton ang pasyon sa atong Ginoo
tiaw mo ba nga ang iyang gisingot dugo

dili malalim ang korona sa ulo nga tunok
og sa iyang agtang ang dugo mibunok

dili maagwanta ang pagpas-an sa krus
apil ang mga biay-biay sa mga walay polus

kinsa kaha'y makaantos anang mga kamot nga laylay
kon ikaw sa dakong krus gilansang og gibitay

naa pa'y iyang kilid nga gitugsok sa bangkaw
og baya mibuhagay ang dugo nga lasaw

pagkapait ba gayod sa gidangatan sa atong Diyos
aron lang kitang makasasala maluwas sa kapit-os

apan ayaw kabalaka kay sayod baya ako nga kining imoha
sa paghandom og pagpakonsyensa kutob ra karong semanaha.

ang paliko-liko nga dalan

tinood makita diri sa ubos ang balay nimong gamay
didto sa tumoy sa bungtod

abi nako og duol ra og busa mikatkat ko paingon didto
dire-diretso og nag-abot baya ang akong suwang og tuhod

nianang pagkahabog sa maong bungtod og ikaw nga nag-paabot
nagkatawa sa maong pagsulay sa pagtagbo kanimo

dili diay malalim ang pagtungas
karon nakasabot na ako nianang pagsaka nga liko-liko

subay sa kilid libot libot sa maong bungtod og sa walay
kahago pag-ayo miabot ra ako didto og nakighinabi kanimo

sama usab kana sa akong pag-ila-ila kanimo
dili mahimo ang panaghinabi nga dire-diretso

nindot ang liko-liko ang pasaring-saring una
pahulay sa tungas, palami una sa mga sugilanon

dili ko una ilhon kon kinsa ka og si kinsa ako
maghisgot una kita sa mga bulak og mga panganod

ato unang aninagon ang kahayag diha sa nagpahipi nga kangitngit
ato unang tan-awon ang mga sidsid sa panapton ayha na dayon ang tapakonon.

Sa Maka-usa

sa maka-usa angkunon ko
nga nahigugma ako sa kainit sa adlaw

ug nagpasalamat ako sa iyang pagsagop kanako
didto nga nagluko ilalom sa kamingawan

gihabulan niya ang katugnaw
sa akong balatian nga nagtago,
nagkagidlay

iyang giilisan ang hubo kong kasing kasing
ug gibistihan sa kabulakan nga anaa karon gibanig
sa akong nataran

salamat kaniya nga nag-abli sa akong galamhan
naghatag sa kaisog ug kataos paglig-on sa kaugalingon

ug nga dili maulipon sa kangitngit
nga kanunayng nihagit kanako didto pagtago

karon dili na ako ignuranti
karon abli na ako ug gipadayon sila
sa walay kahadlok

apan utang ko kini kaniya nga miuban kanako kaniadto
samtang ako lang ug nag-inusara

salamat kaniya.

Lawak Nga Balaan

Lawak nga Samaran,
Lawak nga Balaan
Andam musapupo,
Mudawat sa gustong mudayon

Wala magsapayan
Bisan ang bungi, bungol,
Buta, bakol, nagkagulihay
Ug ang madinumtanon

Ug bisan gani ang
Tulisan, kawatan, mangunguot,
Nakapatay, nakapanglimbong
Iya kining kaluy-on

Andam Siya sa pagpadayon
Nila nga naghubo sa sapot
Sa pagpakasala
Ug nagsalikway sa kaligutgot

Ug niangkon sa Iyang tiilan--
Sa krus nga Iyang gipakamatyan
Haron makadayon kitang tanan
Nga iyang mga inimbita

Sa lawak Niyang Balaan.

Ang GIUHAW

Kasing-kasing mo nga giuhaw
Sa tubig nga linaw og matin-aw
Bisan usa ka tulo ikaw makatilaw
Apan kini kanimo buot ihikaw.

Nakaplagan mo ang usa ka atabay
Nga sa imong kauhaw makapahupay
Apan sa pagyarok ikaw nakabantay
Ang tubig sa timba malubog man diay.

Apan karon sa kalawasan naglatay
Hinungdan nga ikaw nagsusapinday
Buot isuka ang maong nagdagayday
Nanglimbasog sa hilo nga makamatay.

Nalingla man sa gitanyag nga mainom
Naligo man niini og nagsalom-salom
Nagpakatagbaw man didto sa ilalom
Nihaw-as na sa usa ka dakong urom.

Tubig sa kinabuhi padayon modagayday
Tin-aw man o lubog dili na motalidhay
Humda og apil ang imong kasing-kasing
Aron masayran mo kini kon dunay buling!

gipangita nimo ang kalinaw

gipangita nimo ang kalinaw
mao kana ang akong nadungog sa imong mga hunghong didto sa hangin
matag gabii matag kaadlawon

gihandom mo ang baroto nga nagpaabot kanimo
unsa ba gayod ang iyang gisaad?
wala niya gisaad ang mga pako sa kalanggaman
wala niya gihalad ang kahomot sa kabulakan
apan misugilon ka
nga andam na ang tanan og wala na'y makapugong pa kanimo

mobiya ka na dinhi og kaming nahibilin nagpakahilom lamang
kay kinsa ba gayod ang makabuot kanimo?
panahon na ang pagtugyan kanimo sa imong gipangita
dili ka namo pugngan kay ang mga bukog sa imong mga tiil
haskang lig-ona na

lakat sa dalan sa kinabuhi
og kon unsa man ang imong dangatan
ayaw kalimot
ang atong balay adunay mga kamot nga andam gayod sa pagdawat kanimo
kon ugaling mobalik ka man nga pakyas
kon ugaling mobalik ka man nga buhi.

ang pagdawat sa kamot sa usa ka puya

ang pagdawat sa kamot sa usa ka puya
diha sa imong mga kamot nga kunot na

ang pagbati sa gagmayng mga tudlo
diha sa dagko og lalom nga mga linya sa imong palad

ang panagtakbo sa humot og sa gahi
ang pagkabaga sa kubal og sa katig-a na sa kasingkasing

mao kana ang akong giingon kanimo nga wala nimo makita
mao kana ang hulagway sa usa ka paglaom

tutuki pag-ayo og kon mahimo hikapa pag-usab
pangitaa ang mga butang nga hagbay ra nimong gikalimtan

panamilit sa usa ka tigulang na nga rebelde kaniadto

sa una sa akong kabatan-on
sa nag-eskwela pa ako sa kolehiyo
kon aduna ako'y makita nga sayop
dili gayod nako katulgan
kay ako gayod nga korehian

panahon kadto sa idealismo
ang pagtug-an sa tinood
og ang pag-usob sa angay gayod nga usbon

miabot gayod ang panahon
sa pagsaka sa mga bungtod
og pagtago sa mga kabukiran
aron lang makuha ang saktong kausaban
anaa didto ang pagsupak
og ang pagsukol

miabot ang pagkahinog og ang pagkaluya
ang kalayo sa akong dughan napalong na
og ang tanang gusto na nga mopasilong
motidlom
og magpuyo na lang nga malinawon
og mismo sa sulod sa atong panimalay

makita na usab nato
ang mga sayop nga angay usbon
apan miabot na ang panahon sa katapol
og nabuntog kita nianang pagpasagad na lamang

gipasagdan ko na ikaw
bisag unsay imong buhaton
og dili na ako mangilabot pa

moingon ka nga kini ang mahitabo
tungod kay wala na kanako ang gahom

sa ginaingon ko gipasagdan ko na ang mga umaabot
og ang mamahawa

mokatawa ka nga naghawid sa gapos og sa timbangan
samtang ako naglingkod sa akong bangko
mipatong sa akong tiil sa lamesa
og mipiyong sa akong mga mata

kuhaa ang tanan kanako
kay andam na ako sa usa ka pagpanaw
magpahilayo ako kaninyong tanan

maayo unta og duyugan na kamo sa maayong kapalaran

Ang Maglalangyaw

Bug-at nga desisyon ang gipili
Aron maharuhay ang kinabuhi
Bisan kamingaw ang maong bugti
Molampos lang sa gilatayang pisi.

Ang mga gibati sa kaugalingon
Kini dili nimo panumbalingon
Alang sa imong mga biniyaan
Antoson mo nalang kining tanan.

Nahisama ka sa usa ka piniriso
Didto sa dakong hawla nagpuyo
Uhaw sa duaw sa mga mahal mo
Mainit nga pagbati nga daw kalayo.

Sa pag-inusara mo sa kagabhion
Ikaw nag-ihap sa mga bitoon
Dungan sa pagkislap ikaw miingon
Usa kaninyo ako rang maangkon.

Dili gayod sayon ang imong pagbiya
Apan kalisdanan ato lang ibaliwala
Pag-ampo og ang Diyos ang bahala
Inubanan sa kakugi og mga paninguha.

Dili tiaw-tiaw ang paglangyaw
Hataas nga dalan imong ginalakaw
Madag-umon man ang imong nahagdaw
Malantaw mo ra ang bidlisiw sa adlaw!

sa pagpanglaya sa mga sagbot

miabot na ang pagpanglaya sa mga sagbot
nianing panahon sa tumang kainit
ang mga pyuos dili na mamahimong mga bulak
kipot ang ilang mga ngabil
og mangamatay sila nga dili na makabungat
sa ilang mga pulong nianang pagpamusyak

ang akong gikahadlokan basin moabot na usab
masirad-an ang pultahan og wala na'y mangabri
dili na ako mangutana pa
dili ako manuktok
dili sab ko motingog.