ang perlas sa akong taklubo

kon manginhas ka
ayaw sa mabaw
kinhason ra ang imong
makawkaw

ali diri sa lalom
salom, salom, salom pa gayod
naa ang dako kaayong
taklubo

muokab, mosira, moukab,
lantawa lang ang iyang
perlas

ayaw kuhaa, ayaw gayod ug
sulay ug kuha,

lantawa lang, ayawg kisaw,
ayawg ikiwil ang imong mga tiil

lantawa lang
ako lang kana, ako  lang gayod kana

dili mo mabati kon unsa kahapdos
ang kahapdos

busa paningkamoti ayaw intawon
ug pagkuha sa  perlas

mubong sugilanon sa taas nga kahidlaw

mubong sugilanon sa taas nga kahidlaw

kapeng hagbay nabugnaw

ug gihulmigas nga plato

sa kamoteng gibarbekyo 

samtang sa pagkatagpilaw 

sa imong dughan gahaylo

ang bilangkad sa libro

-- RIC S. BASTASA

tulo ka sulat sa akong minahal

tulo ka sulat sa akong minahal

ang unang sulat mao gayod ang alang kang nanay:

"nay dia na ko diri
dako ang unibersidad
ako ray lahi ug pantalon
ang akong polo shirt
daan, ang akong kauban
sa dorm di pa kaayo nako
sinati, apan
lahi ko nila nay.
apan ayaw kabalaka
ako jud sundon ang
imong tanang tambag,
magtoon kog ayo nay
di ko magbarkada
simba ko matag adlaw
dayon di ko mangitag
away.

musta namo diha nay?
si tatay mouli pa ba
gihapon nga hubog?
naayo na ba ang petromax?
ang kabaw wa ba maniwang?
daghan pa ba gihapon ug
itlog ang mga bebe?
si peping midayon ba
sa zamboanga?
ayaw palabi ug bilar nay,
makadaot kana sa imong
lawas
ayaw lang daghana ug
bingka kay di man sab
na mahalin tanan

nay gimingaw na ko
nimo
apan antoson ko ang
tanan."

ang ikaduhang sulat
mao sa akong kaugalingon
nga akong kanunayng
gitago sa akong maleta
ug basahon matag
buntag human nakog
simba, dayon nakog
pamahaw.

ang ikatulong sulat
alang kanimo
apan nakahukom ko
nga dili ko na lang
una kini ipadala
kanimo.

gipaabot ko lang
ang saktong higayon
apan

dugay pa gayod kana
kaayo.

kanus-a pa kaha

kanus-a pa kaha

karon dili lang kahayag ang
akong gikinanhanglan

dili kaayo lisog pangitaon
ang kahayag
kay bisan ug sa siradong
lawak
maaninag pa man gihapon
ang kahayag
sama diha sa buslot nga
bongbong
ug pati na gani sa buslot
nga atop
ning atong gipuy-an

mas galisod ako ug pangita
sa kainit

kadtong kainit sa imong dughan
sa imong paa
sa imog bukton
sa imong halok

gihandom ko gihapon kini
diha sa pag-iyagak
sa uway nga katre

dugay na kaayo kadto
panumduman na lang
pagkahuman diha sa paghandom
naghatag kadto kanako ug
daghang kasakit
lalom kaayong kamingaw
nga mikilitog sa akong
kasingkasing

mahimong makalimtan
mahimo man
apan lami gayod gihapong
balik-balikan

kanus-a pa kaha? kanus-a
pa kaha?

nganong nagsulat ba ako?

nganong nagsulat ba ako?

dili ko unta isulti ang tubag
basin masuko ka kanako

kining tubaga mahimong
binulok nga tubag mahimong
tubag sa usa ka laog
sa usa ka tawong kaugalingon
lamang ang
gihunahuna, apan mao gayod

kini ang tinood. Nagsulat ako sa
akong kaugalingon lamang. Wala
nako handoma nga mausab ang
dagan sa panahon,
wala nako handoma nga mabalik
pa kanato ang mga sapa nga
hagbay rang naughan sa
tubig tang gipangita
wala na nako hunahunaa pa nga
kadtong mga dalan kaniadto nga
atong laktoranan
makit-an pa nato pagbalik

hapit na maupos ang akong kandila
busa ang akong kaugalingon lamang
ang akong gisulatan

kabahin kini sa unta akong gibuhat,
sa unta akong gilikayan, sa unta akong
gipangga ug gihigugma,
kabahin kini sa mga nawala na kanako
og sa gusto ko pa untang magpabilin
kon mausob pa man ugaling ang
dagan sa akong kapalaran

dili ko na usbon ang imong kalibotan
ang gustong mahitabo sa daghang katawhan

human sa pagkumot sa papel
gusto ko na lang kining ilabay
wala na nako handoma ang pagbasa
kon unsa gayod ang imong gisulat
didto,

ako, ako lamang, ug ako lamang gayod
ang mga pulong nga gusto nakong litokon
pagkahuman

sa dihang mapalong na ang kandila
kasabot ako sa pag-abot sa kangitngit

kon aduna man ang kahayag
o ang bag-ong dalan, aduna pa kaha
ako'y gahum sa pagsulat bahin kanako?

busa, karon, karon, isulat ko na ang
akong kaugalingon,
ang iyang taliabot nga kataposan
ang tingog sa iyang kataposang pagtinga
dayon unya nakong hipos sa akong kamot
sa ibabaw sa akong dughan.

ang gamayng bata sa kasina
milipot sa dako niyang kontra
gisuntok ang tangkugo 
ug dayon natumba ug samtang
natumba
gikabay-an ang dakog nawong
girumbo ug suntok
hangtod nagisi ang ngabil
nabali ang kilay
nalangkat ang ngipon
ug dayon ang gamayng bata
midagan paingon sa ila
gaiyak
kay kuno gidaog-daog
siya
gikulata, gitabangan,
dayog palaban sa
iyang amahan

ang iyang mga bakak
nanyagit sa iyang aping nga
bisag usa ka kawras
walay tabas

malipayon diri sa barangay Dos

nindot palandungon nga
ana ka na sa New York

picture picture sa snow
kuyog ang gwapita mong anak
nga babaye
nga ang mata singkit kay
lagi kaliwat man sa insik

sus ang mga pahiyom lisod
drowingon
mora gyod ug madungog nako
ang katawang init kaayo nga
basin ug pati ang snow
kalit nga mahilis

lami ang feeling kanang ipakita
nato nga kita malipayon nga mora
bag ikaw na gayod ang
nahimong exempted sa mga
kasakit

daghan pa
bonding bonding sa museum
stroll stroll sa park
fishing fishing sa ambot unsay
ngan anang inyong river
sailing sailing sa yacht
shopping shopping sa
mall

abi mo ganahan ta kong masina
apan nakadisider ko nga dili na

sa tinood lang
nakapanghagdaw kog daghan estorya
nga mas sakit pas akoa
kabahin nimo ug nila

nakaiyak sab ko
mas feel nako ang tinood nga kamingaw karon
on the other hand
mas misurop sa akong huna huna nga dinhi sa
atong lugar
bisan ug asin-asin lang o utan-otan lang ginagmay
mas nindot ra gayod diri

wala ang angst
wala ang rush hours
wala ang deadma
wala ang stoic indifference

kanang awkward silence
ug kanang
i need space and you have to move on with your life
mga estranghero kana dinhi
nga kon imong ipailaila
magpanglingo silang tanan

tuba tuba lang
sumsom sumsom gamay
tsismis tsismis
(kana imong giingon nga
di ka ganahan)

apan on the other hand
malipayon.

for a change...

kagabii hayag ang bulan
adunay tulo ka bitoon sa iyang kiliran

di kalikayan nga lahi ang bation
silong sa kahayag unya sa unahan
anaa pa gihapon ang kangitngit
ug ang tumang kahilom

aron mausab usahay ang lakaw
sa akong kinabuhi
di ko ikaulaw nga niadtong gabhiona
nga nindot untang isulat ug balak
unya akong basahon diha kanimo

namubo ra ko ug tanom kay di nako
maantos nga lantawon lang ang
nalayang kamatis nga gitanom ko
sa taas sa atong giabogan nga veranda.

mahimo akong kataw-anan kon
awaton ko ang imong tingog busa
gibalikan ko ang akong tinipigan
ang tingog sa dagook sa akong tiyan
gipamati ko pag-ayo ug gisulayan
paglitok pag-usab, ug mao kini karon
ang isulti ko kanimo. Hawhaw, dagook,
haguros, pyuos, hilos.

SA LAING BAHIN

sa pikas nga

bahin 

anaa ang tulo ka

lubnganan

ang mangkay nga

si anecita nga sa dihang

gitulis sila

nabuhi kay makamao mang

magpatay-patay

ang iyang gikamatyan

pagkahuman niadto

mao ang iyang 

katigulangon

tupad kaniya mao si

modesto ang iyang mangkoy

nga igsoon

siya ang gipatay sa tulo ka

tulisan

gisangsangan sa trapo ang

iyang baba

ug dayon siya giluba-luba

kay wa gayod niya

gitug-an kon asa gibutang

ang ilang kwartang

sinugong

gidungog nga kawatan ug daro

si modesto

apan kon adunay mangita 

iya ra usab kunong iuli

sa way daghang 

sugilanon

sa tunga nila ang ginganlag

demetrio

nga sa buhi pa si modesto

giangkon kini niya nga iyang bugtong

anak sa iyang labandera nga

ginganlag teodula

ang gikamatyan ni demetrio

mao ang sugal nga domino

taas pa ang sugilanon ug

anaa pa gihapon ang nagpahiping

mga misteryo sulod sa ilang mga

nitso

apan wala na ako'y oras

hapon na, mingitngit na ang kalibotan

ugma napod nato kini hisgotan

sa laing paghayag na usab sa kasadpan.

paghinumdom ni lolo nga natawo sa 1898

dugay na
baya siyang patay
apan ang
kagot sa iyang ngipon
sud sa dako kaayo
niyang apapangig
madungog ko gihapon
inig tak-ang nako
sa lung-agonon
nga anagon sa among
karaang pugon.

sa una seguro
mahadlok pa ko.

didto sa basakan diin human na ang ani unya gitugway ang kabaw nga gipatungan sa usa ka puti nga tulabong

nagpatong ang
tulabong gamit
lamang ang usa
ka tiil sa ibabaw
sa kabaw nga
nagsabsab sa
humay nga bag-o
lang giani

silang duha
walay tinguga'y

ako sab tupad
nimo silong sa
kahoy sa mangga
ning init nga
kaudtohon.

pahulay ug lahotay

matag adlaw
malabyan ko ang menteryo
daghang hunahuna ang
moduaw kanako

hinay ang dagan sa
akong sakyana silong
sa mga kahoy

abogon gihapon ang
dalan dinhing dapita

lalom kaayo ang kahilom
ug usahay mohunong ko
aron pagpamati kon unsa
ang pulong sa kahilom

daghang dahon dinhi
laya, nagpaabot sa hangin
ug kon moabot na kini
magdungan silag kapalid
kon asa sila dalhon unya
kon mohunong na ang
hangin, magtapok silang
tanan sa usa ka lugar nga
morag mga langgam nga
nangahulog sa langit ug
puros mga patay


daghan na akog mga higala,
silingan, mga kaila nga ania
na dinhi nagpuyo

lawas na lang ug bukog
hinipos sa mga sementadong
tagoanan

ang kinabuhi nga mabati dinhi
mao lamang ang mga hoyohoy sa
hangin, usahay, ang ulan, ug kon
duna may kalahian, kana kon
moabot ang kilat ug dalugdog

dako kining lugara, mingaw,
adunay bakante nga lote sa
unahan, pipila na ka tuig,
wala pa gayod himoi kini
ug usa ka panimalay, kay

kon ako ang pasultion, aduna
gayod gihapoy kahadlok ang mga
buhi sa mga gilubong nga mga
minatay

ug ngano ba kaha? ingon si tatay
ang kalibotan sa mga patay sa
patay lamang, ug ang kalibotan
sa mga buhi, kanunay kining lahi.


ibutang ta nga kini mao ang atong
kapaingnan,
dili kini nato malikayan, apan kinsa
ba ang isog nga makigsandurot
sa mga patay, ug makigpuyo diha
tupad kanila.

pareho ang atong tubag.
lahi ang atong pagpakahilom sa
ilang pagpakahilom.

ang ilaha, pahulay, ug ang atoa,
tawgon kog, lahutay.

lahi na sila karon
mamati kuhuhay, apan
maulaw ka lang
kay dili baya
buhaton

kaniadto, ang mga
pulong ni tatay ug
nanay,
amo gayong gihimong
panimalay

didto giluto namo
ang among gikaon,
didto ang among
gilabhan ug gipauga
nga habol maoy
among gikatulgan,

wala kami suga nga
kaugalingon
kay sila ang suga

wala kami unod kay
sila ang unod
wala kami kalipay
kay sila lamang ang
kalipay

giantos namo kini
giloum ang tanan
apan nasabtan ra namo
sa kaulahian

karon maglantaw kami
kaninyo sa tumang
kasina
apan kami wala magmahay
kami na karon ang
kalipay
kami na karon ang mas
undan pa kaninyo
baga ang among bukog
lig-on kaayo ang among
likod
gahia ang among mga tikod
ug dili mo kami
sa inyong mga pisi
masukod.

pagtuki sa kaugalingong buluhaton

kon buhaton mo,
lamian,
apan pagkahuman
bitaron ka niini
sa pipila ka adlaw
unya sa dalan
ikaw maulawan,

kon dili mo buhaton,
sakit,
sakit ang pipila ka
adlaw
hapdos, laylay
sagol haw-ang,
di kang kasabot,
dili ka duawon sa
katulogon,
apan,
mabati mo nga
ikaw

mas lig-on na
karon
kaysa gahapon

pagkadaghan gayod sa
mga bitoon sa langit
nga galibot sa usa ka
maanyag nga bulan

puros kaha kini sila
tinood nga mga bitoon?

wala.

nagpakamisteryoso ka
kon dunay pangutana dili ka motubag
kon dunay nahulog nga baso ug kusog kaayo ang pagkabundak
sa salog nga sementado unya nagpasad ang mga bildo sa salog
igo ka lang mitan-aw
ug dayog gawas sa balay

abi mog nangutana sila kon asa ka padulong
ug ngano
wala.

ang pagbilar nako sa cappucino didto sa starbucks, jones

di ko ganahan didto
lalom ra kaayo ang ilang iningles
unya mabaw ra kaayo
ang ilang gihisgotan.

kaadlawon
samok kaayo ang mga
sunoy nga
siging gatugtugaok

unsa kahay gibagutbutan
aning mga animal?
mas maayo pa kining
mga inaan
nga naglomlom sa ilang
mga itlog sa
pugaran
walay saba.
kining mga di sabaan
kasagaran
sa kalipay naghambin.

miabot na ang panahon
di nako isulti kon asang lugara
di ka na mangutana kon sakto
o sayop ba
di ka na usab mangutana kon
dis-a kini siya gikan ug unsay
iyang gibuhat
miabot na ang panahon nga ikaw
nagbuhat lang sa gusto nimong buhaton
wa ka na gani mangutana kon angayan
ba o dili
wala na ang kasagarang panagbingkil
sa kasingkasing og hunahuna
nagpakabuhi ka lang nga malinawon
di ka na ganahang mokatkat sa
habog nga bukid
lantaw ka lang sa panganod
sa mga bitoon
ug ang pagsubang ug pagsayop
sa adlaw
gipakisama mo lang nga kini
mao ang pagkaligo, pagkalibang,
pagpanamin, pagpanudlay,
pagpanambo sa bintana,
paglingkod sa bangko
diha sa dili na kutihan nga
hunahuna.

Cancer sa Pagsulat

gitaptapan ka sa usa ka sakit
nga dili ka kapugong sa imong mga kamot
nga kanunay nagsulat

ug wala na kini kaayohan pa
dinhi ka nabuhi ug dinhi ka mamatay
handomon mo ang mga letra
ang tinta, ang blanko nga papel
birhin nga papel
ug tinta nga lasaw.....

kay sa akong mga kamot gitugyan ko na ang akong kinabuhi

balibalikan ko gihapon
ang gidili

sirado na ba ang bintana?
ang pultahan usbag
liso ang siradora
seguradoha

balikan ko na usab ang
gidiling kalipay

karon kayahon nako nga
balikan ko kini bisag wala
na ikaw kanako

itom na ang akong mga kurtina
unya tilawan ko ang akong mga luha

balibalikan ko gihapon ang
ginagmay kong gidili nga kalipay

kay sa akong mga kamot
gitugyan ko na ang akong kinabuhi

hubag nga itlog

ang tumang kaguol
kon mawala na gani

mapuli na dayon ang
kalipay nga bisag unsa

kagamay sa tungaw
mohubag jud ang itlog.

so much absence, the tiniest presence becomes magnified

paghuman sa unos
bagyo ug linog
mobanos ang hataas
na usab nga
kalinaw, kahapsay,
kaharuhay

mas lami na dayon
ang ginagmayng kalipay

mas tam-is
mas lamian.

A LITTLE MISUNDERSTANDING IN BOLD LETTERS

sa dihang
naila-ila ka nako

ingon ko
soon i will see you

in maasin
sister of biliran
cousin of tacloban

medyo selfish sab
ka

"why would you waste
time seeing me?"

badash
it is not you that i am seeing

it is Maasin.

aguy agi!

upat-upat
lima-lima

dayon
ako
gaduha
duha

mas maayo unta
ug usa na lang

masuko si
Lord

puros laki
man

maong
walo walo lang
gihapon

a note from
friends who sang
 

i left
my heart

in San Francisco
u.s. of  a.

apan sama sa uban walay gipunit.

so many windows
in one room

morag dili na gani
room

morag usa na ka dakong
hall

apan nindot
mawa ang privacy

open
pagkaabri na gayod sa
life

morag park
behaving like a
universe

but
dili nako ibutang ang akong ngalan

ngil-ad
it is so unbecoming of a dedicated writer
alang sa masa
nga giuhaw sa mga tinta
sa no cost

sa mga
walang pakialam kon ok pa ba ang
kinabuhi?

weird
talagsaon
rare
mora bag

beware of dogs
no trespassing

daghang no smoking nga
daghang nag smoke nga ang mga nawong
baga pas
pader

o panit sa sapatos
nga fuckaderm


so, where do i go from here?
maoy kalibog ni argentina

do you know julian?
moundag na kunog sulat

og kon mosulat daw
he will not take it seriously

it is a scattered self
confetti of identities
hanging on the air

tua siya sa ubos
durong lantaw
apan sama sa uban
walay gipunit.

igsoon man god

ang igsoon dili sa tanang
higayon
imong igsoon

labnihon usahay siya
sa kasina

ug ikaw usab suntukon
sa kasuko

naa ang mga bungol
bungol

sa kahiubos ug sa
kahapdos nganong gibuhatan sa ingon

ingon nila ug ingon mo
sahay maoy mga gamot sa kagubot

igsoon kontra igsoon
ngipon kontra sa ngipon

apan kon ang usa ka ngipon
mapaakan sa ngipon sa dili nimo igsoon

ayka, molaban ka gayod
sa imong igsoon kay ang igsoon

bisan unsaon
igsoon man lang gayod gihapon.

he is naked

it is nice to know
that he has fans

it is a hot weather
anyway

he is sweating
both his armpits
and his
pubic hair are all
wet with
the salty taste of
his profuse
sweat

ask him if he likes
it
if he likes fans


he does not like it
he is naked.

swertres

dos por
dos
ang kanunay
nga gasunod
sa akong
ulo

kon mapakngan
ko
maayo untag
mahuman

kay kon dili
basin ug
kanang dos por dos

maoy akong
ma swertres.

dili na ganahang mangilabot pa kanila

sa imong
katalawan
ako na
lamang ang
nagpakaisog

kon dunay
manilip nga
walay tulay
ang iyang
ilong paingon
sa iyang ngabil

kon ang iyang buhok
taas unya lahi
ang kaitom

kon ang bintana
abri unya
wala siya'y
isulti

dali ra kana

motindog ko
sirad-an ang
bintana
dayon mobalik
kog lingkod
ug sa walay
pangambat kon
naunsa na ang
mga wakwak
og mga kikik

mopadayon
ko sa akong pagsulat
ug ibutyag ko
kanila nga
kitang mga buhi
ug mga gustong
mamatay
dili na ganahang
mangilabot pa
kanila

the belief that the dead also emails Hi

what i can't forget
is this: you switch on all the lights of
the room

because the dead
who is the only one who knows his password
has send you and
email and it
says

Hi!

why do you think much on what to write?

kon magluto
ka man ug pancit
ayaw na
kaayog dugaya
kon unsa ang isagol
ug itimpla

pagdali
kay nagutman
na ang mga bisita

ayka
kay nanguli na
sila.

PAGSABWAG

pagkadaghang
mga
lanaw

apan nahutdan
na sila ug
mga isda

gilumutan na
ang mga kilid

gamingaw na
ang mga balas

nangatig-a na
ang mga bato

gihakot ko ang
mga siwil

gihuwad ko diri
ug didto

gisabwag ko ang
mga moginhawa

ang mga motubo
ang mga managhan


wala na kini mga
ngalan

ikaw na ang maghatag
ug saktong hinungdan

mga kisaw sa lipat-lipat nga kamingaw

mitabon sa bungtod 

ang mga gabon ug

nahanaw ang panon 

sa mga kanaway

gipaabot nato 

ang paghupas sa gabon

apan wala na usab 

ang mga kanaway

gihandom nato ang dagat

apan wala didto ang gabon

sa patag nga wala ang gabon

gihandom ta ang bukid

sa bukid gihandom ta

ang dagat ug ang mga isda

ug sa pag-abot sa mga tulabong

gihandom nato ang mga kabaw

ang imong mga kamot

sa tibuok niyang kinabuhi
nakakupo siya
walay pagkulang diha
sa kalo
kanus-a pa kaha malimtan
ang karsones og
sanina

mas grabe ang sa bata pa
siya
kaniadto hipos kaayo siya
sa lampin ug sa duyan
walay lamok walay langaw
nga makatugpa

apan miabot ang higayon nga
siya maghubo
atubangan nimo

kon sa isda pa siya gihimbisan
niya ang iyang kaugalingon
gibiyaan niya ang tubig ug ang
lawod

gusto niyang magpaila na kanimo
ikaw nga iyang gimahal
gusto niyang tutukan mo siya
unya moingon ka kaniya
gimahal ko usab ikaw

ikaw nga naghigda sa iyang
katre
ikaw nga nagpaabot kaniya
tupad kanimo

gibalewala niya ang pagduda
gibungat mo pag-usab ang
paglitok sa "gimahal ko ikaw"
nga gilitok sa imong ngabil

mitutok siya kanimo
gisuroy ang imong lawas
unya sa kataposan nakita niya
ang imong duha ka kamot

puros bakakon.

sa pipila ka mibasa sa akong balak

siyam lang
bahalag maabtan ug siyamsiyam
basta naa koy siyam
ka tatam.

wakwak

ang iyang sugilanon kabahin
sa wakwak
gikawat sa mga wakwak

gisumbong kini niya sa wakwak
nga pulis
nga nagduso sa maong sumbong
ngadto sa maghuhukom nga wakwak

siya lang ang dili wakwak nga nagsulat
sa sugilanon sa mga wakwak

gisugdan paghusay ang sumbong
kabahin sa mga wakwak
sud sa korte diin ang mga abogado
usab puros mga wakwak

ikaw kay wakwak man usab,
kinsa ba ang modaog sa maong husay?

estranghero

sulayi ang paglakaw
palayo
unya sayod ka nga
wala kay saktong
adtoan
o katuyoan diha
sa imong pag
abot,

sulayi kanang
sa imong pag-abot
walay motagbo
wala kay nailhan
og silang tanan
wala sab kaila kanimo

ang mga balay
una mo lang kining nakita
ang mga dalan
wa mo mailhan ang mga ngalan


motuktok ka sa pultahan
ablihan gamay ang giwang sa bintana
dayon sirad-an

gipahinayan ang TV
dayon ilang gipakusgan

gusto nimong taposon
apan wa sab ka kahibalo kon
asa sugdan

ayawg hangad
sa iyang suwang
mahimong mohangad
kas buwan

ayawg katulog sa
iyang tupad
kon mahimo katug
sud sa imong
kasingkasing

di ba templo ang
imong lawas?
di ba ikaw lang
ug wa nay lain?

ikaw ang miabot
ug ikaw ang mopahawa
kinsa ba pa diay
ang lain?

ikaw man lang
seguro ang tatay nga
nakalimot sa imong
nangagi?

kadtong nahigugma ka
unya
wala pay gahom ang imong
mga kamot
kadtong gianod ka sa baha sa
gugma sud sa imong
dughan
unya nagkapakapa ka
nga bisag mogunit sa hait
nga punyal
bahalag masamdan
gunit lang gayod gihapon

kadtong nanglaba ka sa lampin
sa una mong anak nga lalaki
kadtong nabilar kas pagtimpla
sa gatas

sultihi daw siya kon unsa ang
mahigugma?
kon unsa ang mahulog unya
mobangon lang gihapon?

basaha unya ang tanang nangagi
diha sa mata sa imong una nga apo.

ako unyang lantawon ang imong
pahiyom nga maoy
makahinumdom...

SAAD SA SAMDANG MASA

silang naay mga ngalan
apan walay nawong
silang naay mga kwarta
apan walay kamot
silang gitawag ug mga
halangdon
nga dili mo matagaan og
mga numero
sila nga dili mahimong
magtagad
sila nga siging mag-una
sila nga tag-iya sa tanang
mga pagdayeg
sila nga maoy tag-iya sa
tanan nga imong malantaw
gikan dinhi paingon didto
didto,didto sa layo pa gayod,

ilista lang, kay ato unang
pautangon.

kadtong babayeng
kulongon ug buhok nga
bag-ong nagmata sa
sayong kabuntagon
palihog ayaw gayod ug
hagita

kadtong nanglabay kaniya
kagabii
gibuhian man galing niya
apan

bugnaw na.

usahay abrihon mo
ang bintana
sa paagi nga ikaw lamang
ang makakita sa nanglabay
apan sila
dili makakita kanimo

mora bag kon ikaw makit-an
maguba gayod ang plastada sa imong kalibotan

asin ka bang mahilis sa ilang
nagbasa nga mga tutok?

kusog kaayong ulan sa
ilang mga tutok
alang
sa asgad mong kagahapon?

ang balhiboon nga
kamot
ugma damlag
makahimamat sa
iyang posas

ang sampot nga
ugdo
kon magdinangag
mawad-ag
pitaka
mabuslot ang bulsa
mobudlat
ang mata

ang suba mamad-an
ang kahoy mahutdag
dahon

apan ang dagat
kanunay asgad
ang langit kanunayng
walay utlanan
ug ang kahilom dili
mahimong
molitok sa mga pulong
nga imong
gitan-ugan

kon ang kuto
imong irokon
kon ang buwak
imong putlon
kon ang pulgas
imong pusaon

kon buot kwentahon
kini pagpatay lang
gihapon

apan unsang
kalipaya ang kalipay
diha sa pag-irok
sa kuto diha sa ulo
sa imong amigo?

sa pagputol sa
buwak
sa pagtan-aw niini
diha sud sa
basong gibutangan
mo ug tubig?

unsang kalipay ang
mibayaw kanimo
didto sa langit
sa dihang hapit
mo na mahurot ug
pusa ang mga pulgas
sa irong ginganlan
mog Diego?

adunay isda nga
walay unod

kay puros na
lang bukog

adunay prutas nga
ang nabilin
patay na lang nga
kubal

adunay tawo usab
nga wala nay kalag

patay ang konsyensya
morag buslot nga bulsa

balak sa impontu alas dose sa kagabhion

matug o
di matug?

mao kana
ang pangutana

nga unta
tubagon sa duha
ka mata

apan ang kamot
morag isdang
nahubsan ug tubig
diha sa sapa

karon
nagkapakapa
nagdamgo
nga unta
ang kalibotan
sama kadako
sa dagat
sama sa kalalom
sa wanang
sa kahilom...

misaad ako ang
undangan na unta kining
pagsulat
ug balak

gibilaran ko ang mga
dili bililhon

milalom ang kalimutaw
sa mga dili mapalit
ug mahalin

misaad ako nga
unta ako
magmalinawon

subay sa tul-id nga
dalan
sa yano ug mga
sarang

apan dakong sala kining
akong nabuhat
sa akong kaugalingon
ang mga saad
puros mga basong
buak

mga bildong hait
nagpasad sa akong dalan
ug ako misayaw
bisan ug samdan

sama sa tiyan nga
napuno sa hangin

ang ulo usab nga
walay sulod

anad kining magpagawas
sa pusot pusot nga mga utot...