6/19/2009

handumanan

mahinungdanon ang maong libro
maong tuyo gyod kong naghuwat
bisan sa kainit sa panahon
dinhi ning daplin sa karsada

karong taud-taod imo kining itunol kanako
gikan sa bus nga imong sakyan paingon sa habagatan
diin tua naghuwat kanimo ang agta sa lumboy
nga nag-andam nag linarang nga bakasi

sayod ko nga magtagbaw gyod ka
sa imong kahinam nga makatagamtam na usab
sa kalami sa sud-an nga iyang giandam alang kanimo
matag pito ka tuig ra gud mo magkita

mao bitaw nga sa kadugay ninyong wa magkakita
nakasuwat kag walo ka gatos
ka mga balak nga alang lang kanako
mao kini libroha nga imo karong igasa nako

apan pagbantay baya
kay basin ug di ko makapugong
ug kuptan ko ang imong kamot
aron makatikang sa bus ug makasakay

bahala nag unsay buhaton sa agta
nga nag-andam ug bakasi
iya bang pangunayan ug kaon
ang iyang kaugalingong linuto

aw ngano mag manganaog ta sa unahan
ug magsawo tag pangaong duha
sa bawon mong litob
ug sa ubud nga akong dala

basta akong isaad nimo
nga ampingan gyod nako
ang libro sa imong balak

bahala nag mamantsahan kini
sa duga sa atong saw-an nga pagkaon
handumanan kini sa atong pagpangaon
busa akong basahon hagkan simhut simhuton