ang karon nga atong gipuy-an

gipuy-an lang nako ang karon.
lahi na sab ang ugma.
ang kagahapon sakayan na nga
atua sa pikas tampi sa lubog
na kaayo nga suba.

kon ang karon mao ang imong
puluy-anan
wala ang kabalaka.
sa damgo ka nagtago diha
sa imong mga ugma.
kon gipuy-an mo pa ang 
kagahapon
mabuslot ang sakayan
maunlod ang isla
mauga ang suba.

ang karon sama sa usa
ka plato nga kan-on
tupad sa piniritong bulad
ang kahalang sa sili
ang saktong kaaslom sa
suka
ang kalabangahan nga 
manggang bisaya
nga gihinuran sa uyap
dili mo ikapanugilon

mao kini ang karon
asgad, aslom, halang
unya wala nay pagtagad
sa kon kinsa ang moabot
ug mopahawa
kon kinsa ang molabay
lamang.