nianang pagpahilayo usahay

nianang pagpahilayo usahay
diha nato makita ang wala pa nato makita

kay kon dug-ol ra kaayo ang atong dughan
ato lamang mabati ang pitik
sa kasingkasing

og ang kainit sa mga bukton
og katam-is sa mga ngabil

sa pagpunay og piyong nabutaan kitang duha
og wala na kita'y makita nga kamatooran

dia ako diri sa ubos ug anaa ikaw sa taas
lagyo ang atong mga gitindogan

nakita ko ang bungtod nga nagharag
nakita nimo ang patag nga yabag.