gaan kaayo ang akong ulo
morag usa ka bulsita nga wala nay sulod
misaka ko sa hagdan
walay lingilingi sa akong gigikanan
habog na kaayo ang akong naabtan
og karon wala na akoy gihuptan
gawas lamang sa imong usa ka pasalig
nga didto sa lugar nga imong gipuy-an
anaa ang kalipay nga wala sugod
nako matagamtam nga kini molungtad
sa kahangtoran
apan sama sa gihapon gikan pa kaniadto
sa atong unang panaglambigit
hangtod sa atong pagsinayranay
sa atong mga sulod sa atong kinabuhi
ang gipaautubang mo lamang kanako
mao ang samin og ang akong nawong lang
ang akong nakita
giduol ko kini og gihikap aron masuta kon
ako usa ba usab ka kamatooran sama kanimo
nga dugay ko nang gihandom
giabre ko ang samin
og ang akong nakita mao ang usa ka pultahan
nga imong gisirad-an
og milingi ako sa akong kiliran
anaa ang bintana
nga imong gitrangkahan
ang mahitabo kanako dili pa panahon
og busa ikaw mitutok kanako og
mibiya sa usa ka pahiyom