ang tingog sa
stapler samtang
miingkib kini sa
nipis nga panit sa
bondpaper

ang lagaak sa
pagpunay og abli
og sirado sa kahoy
nga pultahan

ang mga tunob
sa mga sapatos og
sinultianay sa baga
nga mga katawhan

ang agiik sa printer
og ang agaas sa aircon
nga gubaon

ang mga tagik sa
typewriter sa dili
pa kamaong mocomputer

adlaw adlaw
kini nga akong madungog


wala na ang kalipay
sa awit sa mga langgam
sa haganas sa kogon
sa slide sa hamis nga
mga palwa sa lubi gikan
sa bungtod
sa inagasan sa tubig
gikan sa ibabaw
sa pagpag-id pag-id
sa mga kawayan didto
daplin sa suba
sa paglabay sa sakayan
og sa pagbugsay

mao kini ang akong
panginabuhi
andig andig sa
agulo sa kamatayon