kon nasayod ka lang
daghang minggitib
sa nataran
sa akong dughan
mga gugmang dili na
maihap
sa kadaghan apan
ako kining tagsa-tagsa nga
gipangkutlo
sama sa mga bag-ong mitubo
nga mga liso
sa nangka sa daplin sa
dalan
nangamatay sila nga
wala makakita sa
kahayag sa adlaw
bisan usa kanila
walay palad
sakit kon imo akong
pangutan-on apan mao gayod
kana ang
nahitabo
kay ang imong giingon
nga angayan nga
atimanon
mao lamang ang akong
gipatubo
midako milabong og
nanahon apan
wala gayod mamunga
bisag usa lang
bisag usa na lang gayod unta
sakit ingnon ta ka
kon unta ikaw nangutana
mao kana
mao kana ang tinood nga nahitabo
kanato