gibugto mo ang imong
pusod nga nagbugkos
sa mapanaliporon nga banwag
sa sabakan aron
mahimo kang bug-os,
apan lagsik ang imong mga
lakang nga
gisakmit sa aguy-oy
sa mga sunanoy
ug sa kaaghop sa
nagpasad nga mga bala
lunhaw pa dihang
gihagbas ang mga dahon
aron himuong sugnod
sa nag-alintabong pakigbisog
natukbil ang tanlag
sa salingkapaw nga panaghoy
sa kamatuoran.
mahikap ba nato ang dayag niyang dagway
samtang init pa ang atong ginhawaan?
wa ko ikaw igkita
sa panahon sa akong
pakigbangi ug kagahob.
unta, wa ako nag-inusara
nga nakighagit
sa kahulogan sa paghimugso
sa kasi-ot sa mga agik-ik
ug bus-ok nga kasubo.
kumusta ka kaha karon
sa bugnaw ug mangiob
nga sabakan?
.
