unsaon ba nato pag-inilhanay?
dili sa hawid sa kamot
og pagsulti sa ngalan
dili sa pagbutyag sa asang lugar
ta natawo
o asa ta nagpuyo
o unsa ang atong pangita
uhum, medyo gil-as
apan mamahimo usab nga
mag-ila-ila kita sa atong mga hilig
sa atong mga damgo
og sa atong mga kasubo og
kalipay
uhum, medyo lalom
lisod tugkaron ang pag-ila-ila
kay mahimong magkita ta
magtabi mangatawa
makighinabi
apan wala gayod gihapon
kita mag-ila
wala gihapon nato matugkad
kon kinsa ka
og kinsa ko
uhum, lisod gayod ang
pag-ila-ila
bisan gani sa pag-ila-ila sa
akong kaugalingon
bisag kada adlaw
gisudlay nako ang akong buhok
og hugas ang akong mga kamot
og kaligo niining akong
lawas
bisan gani og nakita og nahikap
na nako ang tanan
tanan kanako
wala gihapon ako makaila
kanako
adunay usa ka higayon
nga gitutukan nako ang akong dagway
giihap ang kunot
gisukod ang akong kalipay sa usa ka pahiyom
gimasahe ang aping
giukab ang baba
gibukad bukad ang ilong
gisirado abre ang akong alingagngag
gawas sa akong ngalan
og akong panginabuhi og
dis-a ako gikan
daghan pa gihapon ako
og wala hisayre
kabahin kanako
unya karon
maghandom ko nga ako kang
ilailahon?
kasabot na ko
dili na kinahanglan nga ilailahon ko ikaw
bation ko na lang
mamati na lang ako sa hangin
sa dagat
bation ko na lang ang gamay nga kainit
sa atong mga pulong
diha sa sulod sa bugnaw
nga kagabhion
siguro
makigtabi ako sa mga bitoon
sa way paggamit
og mga pangutana
sa way pagpangita sa mga tubag
bation na lang
mao kana ang atong panag-ilhanay
Nindot! Metapisikal!
ReplyDeleteIgo ang real.
Kay ang pangalan, edad, titulo, alyas, bansagon...
dili man ang real, dili ang tinuod...kay sila...
ngalan, numero,pulong, ug mga tawag-tawag lamang
apan dili sila mao sa ginganlan kun sa gitawagan...kay dili sila motubag, way baba, way mata, way dalunggan...dili gyod gani kadungog...kay silang tanan mga pulong lamang.
Padayon ang realiad, dili mohunong diha sa usa ka pulong...padayon ang pagkunot, dili mohunong sa usa ka kunot lamang, padayon ang pag-ila-ila, kay ang dili mao sa tanang dili mao, mao man ang pag-ila nga kunohay nakaila na, miundang na sa pag-ila.....moundang na sa pag-ila-ila. Patay! Patay kon mao.
Sige, lang...kay ang realidad buhi sa kanunay...ug ang tinuod, gapadayon sa iyang paglawig latas sa kapanahonan ug sa nawong sa kalibotan...Kay wala magpabilin ang kamatuoran didto sa payag ni Aristotle, wala pod nagpabilin sa kinsang Plato diha...
Kay siya lagi nga matuod, ug buhing tinuod, real nga reyalidad...anaa man sa kanunay gapadayon...dili mohunong...bisan sangpiton, bisang tawgon sa kinahalangdong pangalan. Ang tinuod, ang realidad way gitagad, ug bisan si kinsa, way paaboton.:-)
Kita na lang ang mosunod kaniya, mouban sa iyang paglawing, mokuyog kaniya, moduyog sa iyang awit...
Kita na lang ang mopadayon sa pagkig-ila-ila kaniya...sa kanunay ug sa way kahangtoran...