ang baroto

ang karaaang baroto nga gisakyan
ni lolo og lola ni mama og papa
mao ra usab ang baroto nga atong sakyan

puhon sa pikas tampi sa atong kinabuhi
moabot lang kini sa hinog nga panahon
dili kini magpaabot
og dili ka makabalibad sa tawag sa iyang
layag og timon

wala kay dalhon bisag usa ka panyo
ang mga tambal og mga resita wala nay pulos
ang mga tambag dili na madungog
ang bakho sa imong mga banay og ang
katawa sa pipila
dili mo na maambat

kitang tanan mosakay niini
dili lang dungan

mao kini ang panaw sa kinabuhi nga tunhay
wala na'y balikay.