sa una magsulti ko sa tinood
sa una lang kadto dayon nakakat-on ko
nagsulti ko sa bakak
sa una wala ka gayod mitoo kanako
bisan og nagsulti ko sa tinood
mikatawa ka lang
og nakakat-on ko kon unsaon ko ikaw paglipay
nagsugod ko og pamakak
og mikatawa ka og kusog kay mora bag ang
mga bakak mao ang makalipay kanimo
og busa gidugangan ko ang bakak og laing bakak
hangtod nga ang tanan mora na pod og tinood
og miiyak ka og naglibog ko
og ang mga bakak akong gipapas sa mga tinood
og ang mga tinood akong gitabonan na usab
sa mga bakak
hangtod nga mora ka og adlaw og gabii
nagpulipuli ang bugnaw og init
nagsapaw sapaw ang ngitngit og kahayag
hangtod na ako nahimo na usab nga
usa ka kalibotan nga
nagtuyok sa imong lawas
hunahuna sa imong tibook kasingkasing
hangtod nga ikaw nahimong adlaw
og ako nahimo usab mga bulan
og mga bitoon
hangtod nga ang akong kinabuhi
nawagtang
nahimong usa ka kalibog nga tungod og alang
sa usa ka gugma
nga walay kapadulngan
kondili mao lamang ang pagtago sa usa ka lawak
nagpakaisog kini sa pagpuyo sa
usa ka salag sa bakak
nga nag-atiman sa mga itlog sa umaabot pa
nga mga kinabuhi
og ang mga kamatooran nahimong mga
balahibo nga nangahulog sa silong sa
dakong punoan sa kahoy
hangtod nga ang tanan nanglupad
namahawa
nangita sa ilang kapalaran
didto, didto sa layong isla
nga wa pa sugod maabti
sa atong mga pangandoy