kang Mely...

gabii na, nanuktok ka pa
sa akong pultahan kay lagi
si Mama nimo nahulog
sa iyang katre kay wala ka
diha nga nagbantay og
maayong pagkapiang sa
maong tigulang, kay lagi
si Polding nga imong bana
bag-o lang sab nga na-stroke
og wa na lang gani nimo
gipaospital kay gailaid ka sa
kalisod

ang imong pension nga
dos mil kada bulan dili gani
maigo sa bulad og bugas
sa matag adlaw
(wa pay labot kadtong bayad
sa interest sa imong mga utang)

nalata na ang imong tiil
morag hapit na moboto ang
imong mga barikos

wa ako'y mga pangutana
kanimo Mely
hatagan ko ikaw og tulo
ka gantang nga bugas
og pakapinan pa og usa
ka kilo nga isda og
pamilite nga kinse pesos
pauli sa inyong gipletihang
balay

dili ako mangutana kon ngano
og naunsa ka o basin og sila pa'y mohusga
basin kuno og gigabaan kamo tungod sa inyong
pagpapangilad kaniadto

ang ako
mohatag lang
wala nay lain kay abi nimo
Mely sayod ako nga kon ang
Ginoo na gani ang mobalos
sa akong gihatag diha kanimo
dili ka gayod makatoo:

sa tulo ka gantang nga bugas
gitagaan niya ako og basakan
og ang mga humay wala gani
pangan-a sa bagtok og ang
mga binakid nagpunsisok sa
akong mga kamalig,
sa usa ka kilo nga isda
iya akong gitagaan og fishpond
og ang mga isda didto wala
malanag, wala maanod sa miaging
baha og

sa kinse pesos nga akong gihatag
kanimo isip pamilite, gibalosan
niya ako og kinse mil ka pesos
nga kalit lang nga miabot sa akong
hagdanan,

naglibog ako Mely sa kaayo sa
Ginoo og busa
ako magdayeg gayod kanunay
Kaniya
og busa ako
sa walay pangutana kon angayan
ka bang hatagan o dili
andam ang akong mga kamot sa
paghatag kaninyo kanunay
andam na ang gantangan sa bugas
og ang dakong putos niini
andam na ang akong mga sinsilyo
alang kanimo
gihimbisan ko na man usab gani
ang mga isda
nga inyong isud-an karong gabhiona

sama sa kahoy nga kanunayng mamuwak
og sa pagkahinog sa unya sa iyang mga bunga
andam kini'g tagana sa paghatag niini
sa bisan kinsang molabay sa iyang
gitindogan
sa bisan kinsang giuhaw
sa bisang kinsang
gigutom og

sama kanako
ang maong kahoy walay pangutana
kon ang mamupo sa iyang bunga
kon tagaan angayan ba.