dili tabian ang kaanyag sa kinaiyahan

sayong kabuntagon
sa baybayon, pagkahamis
sa dagat, walay kisaw
morag seda nga habol nga
walay lum-it,
nahikatulog pa gihapon
ang mga dahon sa
pitogo nga gihapuhap
sa huyohoy sa hangin,
namahulay ang mga baroto
wala pay tawo samtang
gisuroy ko kining dapita

nagpasad ang mga bulak
sa kahoy nga di ko kaila
kon unsay ngan

kining kaanyag dili tabian
naulaw ang akong mga pulong.