unsaon na lang?

lahi usab kanang
milantaw ka lamang sa hugaw

sama sa lapok diha sa
bukobuko sa kabaw

sa langaw sa ibabaw sa
nabugnaw ng nga sinugbang isda

sa giulod nga unod sa patay nga
balagtok

nagpalayo ka niining mga butanga
apan imo kining gilantaw pag-ayo

gipapas mo ang mga pagbati
kon unsa ang kalimpyo sud kanimo

miawit ang mga langaw sa
unod nga patay

nauga ang lapok sa
bukobuko sa kabaw

ang mga ulod nagsayawsayaw
sa bukog nga nabilin

init na kaayo ang panahon
diha sa kaudtuhon

ang kabaw nagdali nga misalom
balik sa tunaan sa ilalom sa kamanggahan

ang mga ulod naglinya paingon
sa laing patay

ang mga langaw namalhin
paingon sa gaugdong tae

sa kabaw nga bag-o lang usab
nga milunang sa lapok kaayong tunaan


nakita mo kanila ang ilang
pagkamalipayon

nag-ukit ang kabaw sa hinipos nga
sagbot sa iyang alingagngag

nangahilom na ang mga langaw sa
ilang bag-ong panimuyo

ang mga ulod naghay-ad sa kabusog
nga gipayungan karon sa bukog nga ulo

sa patay nga balagtok nga
ila gayong gihurot

mipauli ka sa inyong balay
giablihan mo ang pultahan

gitagbo ka sa usa ka dakong kahaw-ang
ug iya kang gilamoy

ang tibuok mong kaugalingon nga
karon gitipigan na sa iyang baba

ug didto sa iyang tiyan sa kahilom
nakaingon ka nga

mas maayo pa ang ulod, ang kabaw,
ang mga langaw.