kon makita ko na
gani ikaw,
mora kog mahuslo
mora ug dunay
mangahulog sa akong
mga kamot
mas bation ko kini
sa akong ulo
daghan mangapalid
palayo kanako
bisan gani ug dili
kaayo kusog ang
pagbulhot sa
hangin
ang akong mga buhok
ang akong mga hunahuna nga nahisama sa mga buhok
ning ulo ko nga morag iro nga nangarol
ikaw ang makapawala kanako
mora akog kahumayan nga gihagdawan na usab
pagkahuman sa pag-ani ug pagpabulhot
sa tibuok adlaw
ambot ug unsang pagkahitaboa nga
pagkahuman nga ako mawala o
mahapay o
mapalid ug mawala ug
mahanaw
mobalik na man pag-usab ang ako
nga ako
busog, bus-ok, hilom, lig-on
walay kahadlok
walay kabalaka
unya wala na magkinahanglan kanimo
bisan gani sa usa ka hisgot man lamang
o dalikyat sa usa ka paglantaw.
No comments:
Post a Comment
Lami ba?