kita usab mga bulkan

kon buot hunahunaon
kitang tanang mga
bulkan,

hilom kita nga
bukid
ug sa atong palibot
nanubo ang
mga sagbot

tak-om ang
mga baba sa
atong mga
kabatoan

usahay sa gamay
lamang nga
pagkabingkil
moliki ang
atong ulo
dayog buga nato
sa atong mga
kalayo

nagbaga kitang
sulog sa
dagat

gihimugso nato
ang mga pangpang
ang mga isla

gipapas nato ang
mga kagahapon
sa mga balangay

gilumsan nato
ang mga syagit sa
panahon

unya pagkahuman
sa maong katalagman
mobalik kita
sa tumang kahilom

ug silang wala
makakita sa atong
mga kapungot ug
mga kabangis
moabot na usab sa
atong tiilan

mopahulay
moginhawa ug
lalom ug
moingon
nga kining lugara
mao ang akong
hagbay rang
gihandom

husay, malinawon,
wala sugod mahikap
ug puno sa mga tanghaga
ang sugdan na usab
nilag pangita.