usa ka maanindot nga kabuntagon

pipila ka gabii
wala ako makatulog

ang akong kaugalingon
diay usa ka dakong suba
nga wala magsubay sa iyang
dayag nga agianan

aduna diay kini agianan
usab sa ilalom sa yuta
ug sa ibabaw sa mga panganod
ug wa ko kini sukad makita
sa pipila ka tuig nga
nagpunay ug buka
ang akong mga
mata

katingad-an
nganong sa dihang
nagtukaw ako sa
kangitngit
mas daghan na man
hinoon akog
nakita

nagbasa sa singot ang
akong tibuok lawas
nangitom ang akong
mga kalimutaw
nagubot ang akong mga
buhok

sa pipila ka gabii
nga akong tinuyoan
sakay sa mga pako
sa kangitngit ug
kamingaw

nagdungaw kanako
ang mga anino
sa kahoy
diha sa abri nga
mga bintana

apan dili mo kini
maatikan
kay sa unang pag-abot
sa kahayag
kaligoon ko ang akong
lawas
sabonan ko kini pag-ayo
unya ang akong mga
buhok
akong sudlayon
unya suoton ko ang
mga limpyo ko
nga sapot


dayon inig gawas ko sa akong
lawak
magpaila ako kanimo nga
usa ka
maanindot nga
kabuntagon