BALAK ALANG SA MGA KAWATAN

pagkahuman sa dakong bagyo
gipalid ang balay ni Pido
apil ang iyang duha ka anak nga
mga batang babaye
ug ang lola niini nga wala kabantay
sa paspas nga pagsaka sa tubig
daplin sa baybayon
ang iyang asawa
hangtod karon wa
pa igdungog kon naunsa
ug asa na kini
gipadpad sa iyang
kapalaran

dili lang siya ang nahitaboan sa ingon
pipila ka nila didtong dapita
parepareho ug kapalaran
nawad-an, namatyan, nag-iyak,
nangita, naghandom,
nanglagom ang mga mata
wala klarong katulog
ug walay klarong kaon

ang sunod nimong nadunggan
mao nga

dungan silag pangawat ug pan,
mga sapot, mga sapatos,
ug uban pa
sa usa ka tindahan
nga gibiyaan

nahimo kining estoryahan
sa mga nakakita niini sa telebesyon
ug nakadungog niining mga
taho sa
karadyohan

dunay miingon ang kawat bisan unsa
ug bisag asa ug bisan kanus-a
kawat gayod kana gihapon

magamay mang o madako
ang sala sala gayod sa mata sa
Dios ug sa mata sa tawo

kinahanglang dakpon ug ipabilanngo
aron silotan kay wala na silay
pagtahod sa kabtangan sa uban

kinsa ba ang imong ipabilanggo?

dili baya sila

ang imong gipabilanggo mao ang
mga tiyan nga gakutoy
ang mga tiil nga walay sapatos
ang mga lawas nga gitugnaw kay walay sapot

kon ipabilanggo mo sila
mausob pa ba ang katilingban nga gatinga sa dinagkong kawat sa uban?
magmalinawon ba kini?
mosamot ba kalig-on ang mga kamot sa balaod?
unsa man?

ah, kon mamati ka sa pinitik sa ilang kasingkasing
wala kay mabati
ug kon ipabilanggo mo sila wala usab kay
makuha gikan kanila

wala ba nimo ayohag tan-aw?

hagbay ra silang patay.