suroy suroy ning sayong kabuntagon

talithi,
medyo lapokon ang dalan
suroy suroy
ako ra usa

subay sa dalan nga
batoon
kilid sa mga kasagbotan

wa kaayoy kahayag ang
adlaw
nga nababagan sa baga
nga
mga panganod

naa pa ang gabon sa
abaga sa mga bungtod
mitalithi na usab
human miundang sa
makadyot

sa unahan mao ang lapad
nga basakan
ang tumoy mao ang mga
kabukiran
makita mo ang panon
sa mga tulabong
nanglupad palayo kanako

adunay nag-inosara nga
tulabong
sa silong sa usa ka isla
nga kalubihan
nagpabilin
tanghaga sa usa ka
kamingaw

mipadayon kos akong
panaw
gitawag ko kinig suroysuroy
palabay sa panahon
pawala sa sakit sa gahuot
nga dughan

misimang kos alimuot
nga dalan
kadtong hagip-ot
kadtong wa nako maagii
kaniadto

nakita ko ang usa ka inahan
nga nagdala ug silhig
ug dayog bunal sa itom nga
anak nga lalaki
nga nagdula sa iyang kariling

gitutukan siya sa bata
ug dayon gapabaha sa iyang
mga luha

sa kilid anaa ang dakog tiyan
nga lalaki nga naghaploy sa
iyang manok ug nagpabulhot
sa iyang sigarilyo
sa hangin

wala kini mangilabot
kay ang bata wala gyod dagway
buot

wa ko mihunong
dili kaayo talagsaon ang maong
talan-awon
giandan ko na kana
sukad pa kaniadto
kanamo ug sa among mga
silingan

wala na akoy nailhan dinhing
dapita
sigi baya kong dalhon dinhi
kaniadto ni mama
niadtong buhi pa siya ug ako
gamay pa

mipadayon ko
duol na ako sa bungtod
ug morag layo na kaayo ang
akong naabtan

pangitaon ko na usab kon
asa ako mogawas
kon asa ba ang gawsanan
balik sa akong kaugalingon

mihunong kog kadyot
"kumusta ka na? luag na
ba ang imong gibati"
gipangutana ko ang akong
kasingkasing.