matag buntag ayoha pagsulat ang imong mga damgo
ayaw kuruga ang imong mga kamot
limpyoha ang dalan sa mga letra ug kon mahimo
basaha kini

litoka ang mga pulong
basin ug masabtan ra
(kay usahay baya ang atong mga damgo
morag mga gabon sa sayong kabuntagon
nga nakigtipon una diha sa mga
dahon nga sa iyang kalit nga pagbiya
mahingangha ta unya sa dayon makalimtan)
ayaw pagduhaduha
ayoha paghan-ay ang imong mga damgo
diha sa papel mo nga kasingkasing
basin diay ug mapul-an na siya ug pagpamati kanimo
ug sama sa byuda nga nagbalikbalik diha sa tiilan ni Kristo
basin diay ug ihatag na kini niya diha kanimo.

ang langaw mipatong
sa likod sa langaw nga mipatong usab
sa likod sa kabaw nga mipatong usab sa laing kabaw nga mipatong usab sa bukobuko sa kalibotan nga naglutaw sa kawanangan ug silang tanan nasayod ba kaha nga sa ilang kaulag ug kahidlaw pagkahuman sa sulundon nga hagwag,
nasayod ba kaha nga silang tanan naglutawlutaw lamang?

kadtong mipilit ug gustong mopilit pa gayod sa laing lawas
dili pa gayod makadawat niining milutaw nga tataw
human sa halangdon ug sigi pa gihanpong gihandon
nga kisaw.

mga balak ni michael magpatoc tantoy

Wala na Wala na

Naa ko dinhi bisan kon,

usa ka mangitngit nga panganod,

O bisan nay  landong na nagkaon sa gabii. 

Sama sa usa ka pagpanghupaw nagadulot sa bulan,

kini nagadan-ag  na puti ug pagapatibulaagon na puwa.

Dili ko katabang kung asa ka karon,

kita na mga biktima sa kahimtang,

dili ko makagawas ...dili kita kagawas.

Apan sa gihapon dihay usa ka kagawasan

sa diin ko naglingkod.

Ikaw ug ang imong mga minahal nga maskara,

nagpahiyum malukpanong.

Ikaw na sobra ka balit- aron,

apan sa lujo niini,

pagdumot ug kasubo,

gipangkoloran nimu ug itom,

itom sama sa uling ang tanan.

Wala ko maghandum sa akong kaugalingon,

na bug-os na napasagdan,

binijaan ug sa wala-gikan,

ug ikaw sa gihapon.

nga nangutana kanako kon,

naghunahuna pa ko nimu?

dili ko dili, Baliha kini.

Kalangitan

Sa langit

Ang tono sa nga piano

Nasayud ko na nakadunog na ko ini

Apan ako kalimtan ang bahin ana karon

Ug i-isa ang akuang mga bukton paibabaw

Ang kadagatan ning- balud kanako

Ug kini nagtanaw samatang ngita ko sa langit

Pinaagi sa mga maanindot mga abo nga panganod

Gigakus ko sa ilang gugma

Mobati sa mga handumanan

Balik sa usa ka panahon

Nga ang bata dili mangutana sa kinabuhi

Nabuhi lamang kini

Ug sa usa ka saktong tono

Ang tono sa nga piano

Ang tanan mahimong mas tin-aw

Ug nasayud nganong nangita

kon sa kini na higayon lamang

wala nako mobati nga nag-inusara

Karon mahikatawa nako uban kanila

Tungod kay ako nasayud

Ako gihigugma

Banig sa Gabi

gamay na mga aninipot

ang makita nga kahayag

sa mangitngit nga lawak

kinasasadlakan sa gabii

hanging habagat mao lamang ang

madungog nga hungihong sa bintana

nag-inusara sad ako sa banig

nga nahulma sa pagkahiusa

kainit sa banig lamang ang kauban

sa gabiing wala na sad ka sa kwarto

sa kainit sa banig nalang mugakos

arung makalingkawas sa gabiing nag-inusara

Mugna

duha ka lain-laing mga mga dapit

nagtabon sa atung mga nawong

duha ka mga hinigugma naghupot sa mga kamot

sulod sa kasingsing ug hunahuna

sa mga kabakakan sa matag dalan nga atong giagian

sa kapalaran na atuang gibugna

ta na ug ishagit sa kalibutan

ang atung gugma na gitago sa lungon

kahibaw ko dili ni sila mamati

kining laing klase sa gugma

kahibaw ko  ang makabungog nga mga trompeta

nga motingog sa mga kadalanan sa higayon

nga kita nag-angkon

apan hantud kanus- a ta maghulat?

samatang mga dahon nahug ug paspas

ang juta nagka dunot

panit, buhok nangalagas.

kanus- a?

Express Padala

ibutang nahu ang kasingkasing sa kahon

ug ipadala kini kanimo

ang bulan nagsiga

sa diha nga ikaw nakahukom nga mobiya

sa pagbanagbanag sa kabuntagon

ang imong maleta nga puno

uban sa mga saad

sa imong pagbalik

gisukod nahu ang pangadoy sa ahong kasing kasing

uban sa bulan nga nagasiga  ug nagkaluya

mga suwat na pulong lamang

sa pagpahayag sa walay kinutuban nga gilay-on

karun, isara nahu ang tanan mahitungod nato

gihikot sa pinaka lig-ong lubid

ug i hong hong

ang mga garay sa guma

igo alang sa iyang panaw

Gugma

gugma

bisan pa ginduduso pa

palayo sa dagat

nahalok lang gihapon, nahapyod

ug makakaplag sa iyang dalan

ngadto sa niini.

dulaan nga pahoy

kada lakaw sa ijahang inahan

magbilin kini,

ug mga gilaksi na manyeoka.

sa pultahan, sa bintana, sa lamesa,

sa tibuok balay,

para ni nenang.

kada mubalik si nenang,

gikan sa pagduwa-

nagkatag na kining mga manyeoka.

mukalit ug katawa ug malipay,

mudagan sa hagdanan,

ug unja kolektahun,

ang tanang gitabas na manyeoka.

kada muuli sija mudiretso ,

kini sa kwarto sa ijahang inahan ug magduwa,

pagkahuman ug laajun na kini,

mulakaw sija sa kasilayas - ug muluhod sa inidoro.

ug buhusan nja kini ug tubig.

ugma..naa na pud ning mga gitabas na manyeoka

ug lumson na pud ni nija.

mata na diha kay matug na ta

hoy!

mata na diha kay matug na ta

ajaw katug diha sa sala

ajaw pud diha sa kusina

dire lang - dire lang sa kama

hoy !

paminaw na diha

kay unsaun nalang ning

losyon, deodorant, aficionado

 kung dili ka makasimhut?

kay unja makit- an tang tita

na nag tabun tabun sa dihang dapita

dire nalang sa atung gugma na kama

arung makatug na ta

Ug nganung dili man ka ?

dili pa ba sakto ang tanang nabuhat?

para nimu?

dili pa ba sakto ang tanang nahatag ?

diha ka nimu ?

unsa man diay ka  bulawan?

ana baja dodong ! ajaw na diha

ajaw na balibad naa naku naka ligo nako

ali na dinhi sa akung kama

mata na ta diha kay mangatug na ta!

Orasan 

Usa ka pahiyum na mahimung katawa, 
Usa ka taligsik na mahimung bagjo, 
Usa ka adlaw na mahimung pitlaw, 
ug usa ka buwan na mahimung tuig,


Basin -  mawala na kining kinabuhi-a 
una pa nimu ni makub-tan. 

6: 30 am 
 
ag langit asul
ag langgam nag- kanta
ag bidlisiw makabuta


ug samtang sija ning - mata
sa kong kama, sa akong kwarto

nawad-an ug kahulogan ang oras

Sa Plasa ng Maasin 

Sa dilim nitong Plasa,

Ay siya namang liwanag,

Ng mga nag-babagang puso,

Na nag-hahanap ng pagkakataon.

At sa gitna ng mga punong,

Nabubuhay lamang tuwing dapit hapun.

Na nagmistulang mga posteng naging kandungan,

Ng mga ligaw na tala at panaghoy.

Sa simoy ng mga damung nahaluan,

Ng pawis, luha at perang natuyo.

Sa magdamag na pag- hahanap,

Ng masasambitan nang nadadarama.

At habang si Rizal ang naging saksi,

Nagsilbing gwardya ng mga pagkakataon.

Sa mga umupo , tumayo at tumuwad,

Sa pader ng mga nagliliwanag na eskina.

Heto ako giniginaw at naghintay.

Ngunit walang pagkakataong dumating

Sa plaza ng maasin.

NING KALIBOG UG PAGPANGLOOD

ang iro migukod sa iyang ikog
ang anino kanunayng magsunod sa iyang lawas.

ang atong nawong gibuhat aron dili nato makita
hangtod nga miabot ang samin
hangtod nga naatubang nato ang tin-aw nga lanaw
niadtong giuhaw kita ug gustong moinom ug tubig
gikan sa mga kabugnaw

kon nganong gihimoan kitag likog ug atubangan
sabton mo nga adunay lugar sa atong kaugalingon nga alang lang sa uban
ug ang uban alang lang gayod kanato

ayaw panglood. ang alang kanimo bisan pag imong balibaran
atubangon ka gayod niini ug hawiran ang imong duha ka palad.

ayaw kalibog. ang mga hanap gituyo aron dili ka masakitan
aron dili ka mahadlok. aron ka katulgon, dayon makapahulay.

kabahin kini sa kahayag gikan sa adlaw nga
midan-ag sa mga dahon sa punoan sa bwahan
sa mga tamsi nga tawgon kog kuragan nga siging
paigat ug lupad-lupad tugdong sa mga sanga sa
mga punoan sa bwahan

sa mga dagkong hulmigas nga nagsigig hakot sa mga
mumho sa kan-on nga sobra sa pamahaw sa mga iro
nga busog na kaayo ug karon namahulay silong sa
mga punoan sa bwahan
sa mga salag, sa mga dahong nalaya ug nangahulog sa
tiilan sa mga punoan sa bwahan
makita mo kaha ang pagkabalaan ug pagkabulahan ning
tanan dinhi sa kalibotan sa mga punona sa bwahan?

sumbat sa kasingkasing

aykog ingna
nga dili na ikaw ganahan
pa ug halok ug
gakos
sukad ka gibudhian sa
tawong
gisapopo mo sa tanan
mong gugma
nga nausik lamang
diha
sa usa ka
pagbudhi

sa dhang milabay na
usab ang
kaanindot sa dalan duol sa
kilid sa imong balay
mipasiplat ka baya
pag-usab ug
giwakli mo pa man gani
ang kurtina nga
baga nga
niadtong isang adlaw imong
gitaod
diha sa bahad nga
ikaw
hangtod sa imong kamatayon
mag-amoma
na lang
sa kaisog diha sa
pag-inosara

tawo ka dili
kahoy
dili bato
dili abo
dili balas

ang imong kasingkasing
nagyamyam
sa mga pulong gikan sa
baba nga nanimahong
tuba.

unsaon ba?

unsaon mo ba pagsunod ang
gilabay mong bato nga mitiglom sa
sapa nga naghatod ug mga balod sa pikas nga
tampi?

unsaon mo ba paghikap ang balahibo sa tamsi
nga imong gibuno ug bato nga milupad na palayo kanimo didto sa pikas bungtod?

ang imong iro nga sigi mog gisipa dili mo na mahaploy ang iyang ulo ug ikog
ug bisan unsaon mog ingon nga sulod na balik sa imong tugkaran
dili na gayod kini mosunod pa kanimo
kay ang iyang paaboton aron momando kaniya
lain na man nga amo sa pikas nga labat.

unsaon mo pa kaha pagsumpay ang putol nga sanga sa
bulak nga gumamela human mo kini kutloa kay lagi
imo man kaha kining gihigugma?

walay balak sa tumoy sa imong
dila ang
mobalibad nga imo na siyang isulat
ang tanang balak ganahan nga moambak
mga pispis nga gusto na nga mobiya sa salag
mga pawikan nga nakagawas sa itlog ug gusto na
nga molangoy sa dagat

ang tanang gusto motaliwan
walay gustong magpabilin.

alang kang A.

kapila ka ba nila timbangon, unya dayon nilag ingon,
kulang, kulang pa gayod,
gisukod ka kanunay sa ilang timbangan
nga sa kanunay magsulti nga
kulang, kulang pa gayod,

nakahatag kini kanimo og kahiubos,
mibalik ka sa lawak, natulog, nagpatulogtulog, aron lamang
hikalimtan usa ang tanan,
miingon ang nagtimbang kanimo,
makatabang kanimo ang pagkatulog kay diha mo habokan ang imong
mga damgo
pahulay lang usa, ayaw kaayo ug hagoa ang imong hunahuna
nagdugo ang imong kasingkasing
nakatulog ka diha sa nauga mo nga mga luha
miingon ang tigulang nga bako ang likod,
ugma, timbangon ka na usab namo
unta wala nay kulang, unta sakto na ang tanan
apan wala ka na namati niini
pagkaugma sayo sa kaadlawon sayo ka nga mikagiw
gisunod mo ang imong tingog
ug sa usa ka sako mo nga dili buslot
gidala mo ang imong kaugalingong timbangan
motabok ka sa tampi
ug didto sa usa ka isla diin ikaw lang usa
sukdon mo ang imong kaugalingon
ug sayod ka nga layo kanila
sakto na ang imong timbang ug ang imong kasingkasing
haskang gaana na gayod kaayo
sa langit nakita mo ang banog nga nagpahurayray sa hangin
usa ka damgo, nga sa pag-inosara mo
nagtudlo: sakto na ang imong timbang
sakto na gayod, wala ka nay kulang.

GRAVITY

wala man ako sukad
nakalutaw sa imong kawanangan
apan
gibati ko ang tanang gibati mo.

dili maihap ang higayon nga ako
naglutaw lamang
nakigsulti sa akong kaugalingon
misaad, midamgo, gani usahay
magmahay man nganong
nabuhi, niining dakong wanang
diin ikaw wala na,
adunay usa ka higayon nga gipalong
ko ang tanang suga
ug ang akong nakita mao lamang ang
kangitngit
ug ang akong madungog mao lamang
ang pinitik sa akong kasingkasing
diha sa usa ka pangandoy nga unta
mahuman na ang akong panaw diha
sa usa ka paglutawlutaw
apan sama sa atong nakita kaniadto
kalit ka nga miabot
nga ambot ug diin gikan ug ngano
ug gipakita mo kanako nga ang mga panghitabo
usahay atong balit-aron
aron matugkad ang matood aron makaabot kita
sa atong gustong adtoan
nga ang paglupad ug ang pagtugpa mao ra
nga ang pagsaka ug pagkanaog usa ra kana
nga ang kasakit ug kalipay usa lamang ka nawong
nga ang kinabuhi ug kamatayon mga pultahan lamang
nahibalag ko ikaw sa usa ka pagbiya
ug ang imong pagmahal mao ang paghatag mo kanako
sa dili tiaw nga kamingaw
napadpad ako sa lapyahan sa dagat
miabot ako isip usa ka nagdilaab nga kalayo
gihagkan ko ang balas, gihawiran ko ang balod,
mibangon ako, ug milantaw sa bukid
ug gibungat ko ang dakong pasalamat.

si eloy, upat pa ka tuig.
pinangga sa inahan, kay lagi bugtong man.
ganahan si eloy ug dolsi. kon mahimo lang ang iyang pamahaw,
paniudto, panihapon dolsi.
matag gabii, makamata kini ug manugilon sa iyang inahan
kabahin sa daghan kaayo nga dolsi sulod sa iyang damgo.
nahadlok na ang iyang inahan kon unsa ang mahitabo sa iyang bugtong ug pinalanggang anak.
gani gusto ni eloy nga ang iyang ngalan usbon.
dolsi ang iyang gusto nga ngalan.
mitambag ang inahan, nga eloy, ang imong ngalan, ngalan kana sa
imong amahan, nga patay na.
kaniadto siya ang banggiitan sa atong baryo.
apan si eloy nasuko, miligid sa dalan, misyagit ug iyak, ug aron
magmalinawon, gipauyonan na lang kini sa iyang inahan.

nangapodpod ang tanang ngipon ni eloy.
nangahumok ang iyang tanang bukog.
gihulmigas ang tanan niyang lawas.
nalata ang iyang tiil.
walay nahimo ang inahan.
lahi si eloy, lahi gayod, apan iya kining gipangga
bahala na ug mamatay si eloy
sukot pa sa inahan, basta lang siya magmalipayon.

EKSTRA

sakit lantawon ang
imong pahiyom nga hilaw
sa kataposang
pasiyo,
gilantaw mo ang
akong gilantaw
kadtong damgo nga
aslom
kadtong gustong
kab-oton nga dili
makab-ot nga ug
makab-ot man ugaling
dili baya usab unta
alang sa atong
kaugalingon

ang atong ganahan
dili dali makalimtan
unya ang atong
kasingkasing
kulitogon
sa usa ka tinood
nga atong nasugdan
na unta
ug atong gipanugilon
sa atong minahal
apan nasuhong
dili nato sala ang
ang damgo nga wala
matuman
nasuhong lang
diha sa usa ka
laing panag-ignan
sakit gayod apan
unsaon ta man
trabaho lang kini
ug dili personalan.

AMIGO

wa ko katulog sa dihang giputol sa iyang anak
ang gutay sa pagpasaylo

kon unta miabot pa lang gayod ang mensahe
buhi pa unta ang atong
amigo
dako untang pista ang mahitabo
ug ang tibuok balangay magmalipayon
diha sa inahan, anak, ug amahan nga
nakalampos sa usa ka trahedya
apan ingon ana gayod diay ang gitawag tag maanyag,
ang molambo, ug ang halaran,
kadtong mapurga ang atong mga galamhan
ug atong ikalibang ang kasagaran.

ALAGAW

nindot ang kataposan diha sa karaang silindron
sa duha ka kamot nga nagtagbo, nanirado, nangabri,
ug nag-ilhanay sa dili gayod mahikalimtan diha sa usa
ka senyal

ang pulo ka tudlo
nangasibo.

sa disyerto sa imong kaguol
kinsa ba ang dili makasabot nga ikaw
naghandom ug ulan o dili ba kaha
malinawon nga sapa sa unahan
diin daghang punoan sa manga
nga gahitik ang mga bunga?

kinsa ba ang di ganahan nianang
saad sa bangaw?
ania ang yabe, kuhaa kini, lakaw
paingon sa pultahan,
ikaw ang moabre niini,
mao kini ang ganghaan paingon
sa nindot nga kalibotan,
sa mga sapa nga malinawon
sa unahan anaa ang mga
pagdayeg ug pasalamat.
ayaw kalimot, kay kining duha
ang kanunayng mong mahikalimtan.
ang pagdayeg sa Diyos
and pagpasalamat sa iyang kaayo kanunay.
ayaw gayod kalimti. ayaw gayod.

anaa ang mangtas
gipangutana ka kon unsa ang nawong
dili ka katubag. Nahadlok ka sa wa pa nimo makita.
Sa dili nimo masabtan.
Gipangutana ka pag-usab. Nahadlok ka ba?
Imong tubag, oo.
Unsa ba ang iyang dagway? Dili ka gihapon katubag.
Nganong nahadlok ka man?
Balik-balik ang imong tubag, nga dili tubag
"naa siya diha".
Apan asa? Wala man.

mao kini ang kahadlok. Wala'y nawong. Wala diha.
Apan gikahadlokan.

mao kini ang atong pakigbisog.
dili ta moundang. wala nato gigapos ang atong kamot sa atong hawak.
gipaabtik nato ang atong mga mata.Andam ang atong mga kamot.
Lig-on ang mga tiil.
gilantaw nato pag-ayo ang unahan. Dakong bukid. Sa ubos ang
natulog nga patag. Sa unahan ang dagat. Linaw ang tanan.
Sud sa atong dughan anaa ang kagubot.
Gaunay ang atong mga pagbati.Gikaon kita sa atong kaugalingong
huna-huna. Dili kita mosugot niini.
Bungkagon ang angayang bungkagon.
Kon mahimo, lainon ko kini ug kana.
Aron lang ako mabalik sa akong kalipay sa dihang
ako usa pa lamang ka bata.
Usa ka tingog nga namati lamang sa usa ka tingog.
Usa lang ang agianan.
Usa lang ang gilantaw.

mao kini ang atong pakigbisog.
Nga unta maluwas kita sa atong kaugalingong kagubot.
pagkadaghang langgam nga itom nga ang mga mata pula.
Dugo nga luha. Hait nga mga kuko.
Pako sa kangitngit.
Padulong ang tanan sa kahilom.
Dayon mamati sa awit sa usa ka inahan nga nagpatulog sa iyang
puya sa lalom nga kagabhion.
Ug ang bulan tibuok diri sa atong dalunggan.

IMAHE SA PAGPAMALANDONG

alindanaw naglutawlutaw sa hangin
pagsalop sa adlaw mitugdong
sa sanga sa lawiswis kawayan
siya lag usa

iyang duha ka pako
gihipos.

miari ka aron makalimot
misandig ka sa dughan sa kahilom
gilantaw mo ang imong panit
nakit-an mo ang daghang pultahan
gipili mo usa lamang
sud sa imong kasingkasing
gisubay mo ang dalan
nga malinawon
miginhawa ka ug lalom
mitiglom
nakighimamat sa imong kalag
aron unta dili
malaglag

ayaw kahadlok
ang kangitngit nga miabot
habol lamang sa imong
katulogon

ayaw ug katulog ug sayo
lantawa una ang bulan ug mga bitoon
sa abri mong bintana
hangop diha sa hangin gikan sa kabukiran
lantaw sa kalangitan
pagkadako ning kalibotan
unsa ba ang kabalak-an?
ayaw kahadlok
pamatia lamang
ang humot nga hunghong
sa Diyos
diha sa imong ilong.

sa usa ka tigulang nga tigmama
dili na kinahanglan pang isaysay ang kahalang
sa mam-on, ang katam-is sagol sa kapait
sulod sa iyang baba,

wala siyay libro nga gibasa
wala siyay kasinatian sa arte sa pag-usap sa iyang lagot
diha sa iyang kagot
apan makita nimo sa iyang paghilom hilom diha kilid sa pultahan
nga bitbit niya ang kalinaw
ang kahibalo, ang kalumo,
nga siya wala nay laing pangayoon pa ni Bathala
nga siya andam na sa iyang gipaabot nga kamatayon
samtang giusap niya ang tanan
ang kagahapon ug karon ug ang iyang
kabalaanon.

sa biernes santo
gikaligo ko ang akong iro nga gikagid
gusto na sa akong kauban sa balay
nga kini siya ipanghatag na lang sa mga palahubog sa bukana
aron himoong sumsuman sa
adlaw sa pagkabanhaw

ako ang nagpabilin sa balay
nangita ug trapohang mga abog
ug silhiganang nga mga
salog
samtang siya mikuyog sa via crucis
nagsakripisyo
sa tumang kakapoy sa tumang
kainit
kay gusto niyang puhon
siya makasulod sa langit
ug molingkod dapit sa
frantsit
ako ang nia dinhi nagpabugnaw
sa silong sa kahoy
naglantaw sa akong iro nga gikagid nga
human sa iyang pagkaligo
nagdagandagan
sa among tugkaran
nangitag kapahulayan

kon imong palabian ug buhos
ang kahayag diha sa dagat
ang isla mahimong mora na
lamang nga usa ka langgam
nga naglupad sa wanang.

sakto-sakto lang ang pagtimpla
kahayag gamay, sagoli ug
igo-igo usab nga kangitngit
aron mas makita nato ang
labing tinood.

bisan ug kalayo
ang adlaw
{sayod ka gayod
nga ang adlaw mao
ang dakong bola
sa kalayo

ang dakong lawod
sa ispidno}
dili niya maduslitan
ang imong
gipili nga sigarilyo.

ang tigulang
gitagbo sa tulo ka
uwak
kay wa mangambat
gituka sa usa ka uwak
ang iyang kawo

nalipay ang tiguwang
kay nakapahilom kini
kaniya
ang iyang kawo nahimong
gamhanan
ang duha ka uwak
nagpanglingo
ang usa miingon:
"dili ko kini siya tuhakon
kay dili ko mopalit ug
gaba"
ug ang usa misagbat:
"palabya, palabya kana
siya. dili na siya makabusog
kanato, hinoa, makamatay"
ug gitaod balik sa ulo sa
tigulang ang kawo ug siya
miawit didto sa langit.

managlahi kita
nakita ko na kana sa una natong panagkita

ang mga bitoon gusto mong pupuon gikan sa langit
aron isab-it mo sa imong dunggan ug ikorona mo sa imong buhok
dayon nimog suroy suroy sa gamay mong wanang
lamog sa imong pahiyom

" ako ang rayna dinhi
halari ninyo ako
hagki ang akong mga tiil
ug hawani ang dalan
sa akong pagpasiyo"

managlahi kita

gipasagdan ko lang ang mga bitoon
sa ilang higdaanan
migilak sila, mihayag

ang akong gibuhat mao lamang
ang paglingkod
aron sila maaninaw sa matag
kangitngit sa akong kinabuhi


adunay usa ka bitoon
nga miingon, "kini siya ang atong agalon
kay iya kitang gipasagdan"

mipahiyom lamang ako.
bato lang ang akong gilingkoran.

sa higayon nga silang tanan wala na
ug ang mga lingkoranan mora na lamang ug mga blankong papel nga wala mapalid sa hangin

unsa pa ba ang imong mahimo?

banhawon mo ba ang mga patay nga dahon?
mobayaw ka ba sa kapa sa hangin dayog lupad pangita sa yuta nga naglagitik sa kasaba nga usahay
masaypan nato nga tubod sa kalipay?

sa akong kabahin, gipili ko ang kaisog sa tugas nga kahoy
walay sibugay
walay biyaay
kining lugara puy-an ko hangtod sa ikamatay

ang mga nanubo ug nanoy-ud sa akong hunahuna
papason ko

ang tugas nga kahoy patay
gikuhaan na sa gamot, ug giputlan na sa mga sanga

andam na kini sa laing kalibotan dinhing dapita
diha sa laing hulma, laing silya, laing lamesa na usab

sa umaabot nga mga bisita.

miabot siya sa among panimalay
batang lalaki nga adunay mapa ang iyang aping
unya ang iyang buhok  sa likod
ikog sa unggoy

dili siya motingog kon pangutan-on
apan imo lang senyasan sa imong gustong ipabuhat
buhaton dayon kini niya sulod lamang
sa mubong higayon

gipatawag ko siya, gipatindog, gitutukan
ug akong gisusi ang mapa diha sa iyang
aping

natultulan ko ang tumang kamingaw
sa usa ka batang lalaki nga nahibulag sa iyang amahan

milantaw siya kanako
ug dayog tulo sa dako kayong lusok sa luha

aron unta mapapas ang mapa nga sa kanunay
magtultol kaniya
dili sa usa ka dakong tipak sa bulawan
kon dili

sa dakong bangag nga siging
gipuno sa dakong bunok sa tubig
sa kamingaw.

usa ako ka pulong
nga gukdunon sa mga pukyutan

nektar ako
sa usa ka bulak sa lasang

wala pay usa ka
pukyutan nga mitidlom sa iyang
tigsamad
diri kanako nga miingon nga
ako tinood.

nahimong nindot ang larawan sa imong kasakit.
sila nga magtan-aw, samtang gikwadro kini ug gibitay diha sa kisame sa hangin
nagpunay'g ingon,--

 " unsa man kana? lusa ba sa ulo sa kapayas?
gibinuangan man lang kita
wala may katarungan nganong ang lusa anaa man sa kapayas
nga upaw man kini
asa man diay ang buhok
wala man gani bisag usa ka
lusok?"

ikaw ang tighimo sa dili nila kaayo matuhog
ug busa wala'y buwak nga makita
walay buswak nga mahitabo,

"kini siyang tawhana
nagsigi lang ug tiaw-tiaw sa atong mga kaguol,
kon makita nato
ato kining patyon"

mihulga ang usa nga dunay gitago
nga bungot sa iyang
tiyan, didto gayod sa iyang
ginhawaan

ang larawan usa lamang ka paningkamot nga ang tinood
nga kaguol
mahimong usa ka maanyag nga babaye
didto sa sapa nga naligo nga walay tapis

ug ang tanang kaguol aron dili kini makasamad sama
sa usa ka hait nga punyal
mahimong usa na lamang ka

bata nga nagdula didto sa lapyahan
milakaw sa ibabaw sa dagat dayon nawala

ug ang uban moingon nga dunay milagro dinhing dapita
miabot ang Diyos sama sa usa ka santilmo
dayon nawala.

sakripisyo sa huwebes santo

PASUMBINGAY SA IMONG GILABYAN NGA KALISOD


"wa tawon ko kaagig kalisod
bugtong man ko
wa ko kataak ug basakan
wa sugod ko mapaaki'g limatok
wa mapatongi'g lagong akong
bukton
wa gani matugdungi'g lamok ang akong
aping"

--maoy sulti sa taas ug ilong
unya lagom pa jud ug wait dayon
ang duha ka kamot
balhiboon.

SULAT NI MANOL SA IYANG KLASMET NGA SI BEDOL


sus bay
nakit-an nako ang atong balediktoryan kaniadto
si bong
kadtong brayt kaayos math ug ingless
kadtong numero ang kinaon
unya ang ingles iwiris iwiris sa
isnakan ni nang miring
samtang nag-usap tag mais

sus bay
wa ko katoo
naghakot ug bil-ongan gamit
ang karomatang gubaon
gikan sa kadaatan
paingon sa galas
gisundan nako
ang balay gusbat morag balay
sa kukok
nagkalapok ang iyang tulo ka anak
unya ang iyang asawa
sus bay
nagsayawsayaw nag-iyak
siging katawa
sus bay
naguba jud ang akong kasingkasing
giunsa sa kapalaran
nganong wa magsilbi ang iyang kalantip
sa sulog sa
panahon.

PAHINUMDOM

nangumusta kang
marianito kadtong sa gamay pa
mo surasurahon kang tatay nimo

kanumdom pa jud kang mam cirila
nga ambot ug ngano sa kinagamyang bikil
mapiti man jud sa istik ang kamot ni ramonito
sud sa klasrom
mikatawa ka
mikatawa sab ko
dayon kog ingon isip pahinumdom
nga kadto si marianito miaagi tog morag bisiklitang guba
unya si mam cirila miagi pod anang mawa sa iyang kaugalinon
mogawas sa balay sa tungang gabii dayon di na katultol kon asa paingon ug
asa pauli
sa kataposan ingon ko dapat magpamisa ka sa simbahan
kay silang duha hagbay rang mitahan

gibalakan ko ang mga gagmay
apil na gani ang mas gamay pas
tungaw

giawitan ko ang mga bonhok
apil pa gani ang mas gamay pas bonhok
kadtong di na nato makita
apan
diha sa paghupla sa bonbon
diha sa pagkatol sa itlog
diha sa
pagkatukwang ug pagkapalid sa usa gamayng dahon nga laya
sa ipil-ipil
bisan ug piyongan
mabati nato nga sila karon
kamao na usab nga mobati
sa nag-awit
ug sa nagbalak
ug alang kanako igo na kana nga ganti
sa atong pagtuaw.

kon hapit na gani mapalong ang suga
kadtong lampara nga kusog kaayong mopaitom sa atong ilong
kadtong kandila nga ang tumoy mora na lang ug ulo sa swelas

nan, mopaspas ta sa pagbasa hangtod nga mohanap na ang
tanan sa atong mga mata
nan, mopaspas tas pagsulat hangtod nga ang mga letra mora na lang
ug mga isla sa tunga sa dagat
samtang ang atong sakayan nagpalayo paingon sa kasadpan
nga atong padulngan.....

GESTALT



DILI ka mahaluna sayod ko kon ang akong ilong usa ray buho,
kon ang akong aping usa lamang ka adlip sa manggang hilaw,

MABALAKA ka gayod kon ang akong tudlo duha na lang
makapangutana ka, asa naman ang laing walo ka tudlo?
MAGSALIMUANG ka kon ako lang usa ang magsuroysuroy sa dalan
mangutana ka, asa naman diay si Emma?
INIG abot sa kangitngit diha sa dalan nga ngiob, makulbaan ka kon
nganong usa na lang ka bombelya sa poste ang nagsiga
Apil na niini ang mga lingkoranan sa talad-kan-anan. Asa na ba
ang lamesa? Nganong kutsara na man lang, asa naman diay ang tinidor?
MAO man god ang imong naandan. Kanang imong hunahuna
nga sa kanunay kumpleto ug sakto ang tanan. Nga kinahanglang
wala ju'y kuwang. Nga kon anaa ang hangin, kinahanglan nga ang
dahon mapalid. Nga kon anaa ang balay, kinahanglang naa gayod usab
ang mga bintana, ang hagdan, ug ang pultahan.
Sa laing bahin:
Ug kon ang silya, duha na lang ang tiil, mabalaka ka, nganong ang
ang imoha, dili man upat?
UG kon ang imong mga ngipon, daghan man kining naglaray
sa imong alingagngag sulod sa imong baba,
dili ka mahaluna, nganong ang Diyos usa ra man?
Ugma, hisgotan nato kini. Sulayan natog usob.
Basin ug mabati na nato ang tinood.

Wittgenstein



balikan ta ang
kindergarten

giunsa ba niya
pagkabalo sa atong
gihisgotan?
balikan ta
ang higayon sa
dihang
una niyang gilitok
ang atong
pulong
tan-awa siya
mas malipayon
daling makalimot
di kamaong magdumot
pamatia siya
kusog kaayo ang iyang
mga katawa
atong balikan
atong awaton.

SOCRATES



SA dihang mibalik sa
socrates sa lawas sa usa ka
libot-suroy ug
walay klarong adres ug
trabaho

wa siya kaipsot sa pulis
na charge: vagrancy
kalooy sa Zeus
si Socrates nahimong
way pulos
gilabay
morag sigarilyong upos.

x-PRESYONS



i
if you know pa lamang
i think, you will never gayod.

ii
yononaman yotokapa
yoskana lang
iii
hapon na kumander
wa na si Hop.
iv
fickle is not fecal.
it's cull.
v
onli pols donat
chins der maynd.
vi
nangyam-id
mikusnot ang agtang dayog ingon, "tig mind"
vii
unsay gienter?

nakit-an na nako ang imong sa pipila ka tuig gitipigan
tinood man
hinog na gayod
sa kolor pa lang morag galagiti na gyod ang katam-is
apan sagad sa naandan ug sa maayong pamatasan
wa ko mihikap
bisan galaway ko's kasinaw

ang delicadeza mipatigbabaw kanako
wa kong kalitok sa angay litokon
unya manamin ko
ayohon nakog lantaw ang akong nawong
subayon nako ug nagtupong ba pod ang akong kilay
ug basin nahiwa na sab ang tulay sa akong ilong
o wa ba kaya magbitay kining akong wang aping
gani basin ug milambi sab ang akong ngabil
nga morag napaakan sa
kiat nga lapinig
abi mo
kaganiha nag-inom kog kape bisag init kaayo ang panahon
bisan ug ang akong singot nagkaduhigay sa akong agtang
nga mibuhagay sa akong aping
paingon sa akong dughan hangtod sa akong tiil
apan sakto ka
ang tanan angay na gayod nga ipanghatag
kay kon atong hiposon
na unsaon na lang
puno na ang atong dughan
unya asa pa ba nato ipahiluna ang
uban pang mga kapuol?

unot-unot sa hadlok-hadlok



ayaw ko hadloka
diha sa ngitngit

lami ra ba nang
hadlokon ko
unya pahadlok
hadlok pud kuno
aron lang dayon
kagakos nimo

NIETZSCHE
ang saytkotik nga magbabalak
mikalit ug dagan sa tungatunga nga kaudtohon
misulod sa iyang balay
ug gidagkotan ang tanang mga suga
ang tanang mga kandila

sa dihang gipangutana siya nganong iya kining
gibuhat
miingon siya: wa ba kamo kakita nga haska namang
ngitngita kining atong kalibotan?
nganong ngitngit man?
nawa na ang kahayag kay kamong tanan kamong tanan
inyong gipatay ang tinubdan sa kahayag
unya unsa man kanang tinubdan sa kahayag?
mga buang kamo, wala ba kamo masayod nga ang
tinubdan sa kahayag mao man ang Ginoo ug kamong tanan
kamong tanan dinhi mao man ang nagpatay kaniya
ug busa karon nga ania na ang kahayag diri kanako
dakpon ko kamong tanan ug ako kamong bilanggoon
ug dinhi natapos kining atong sugilanon
mikaratil ug dagan
ug nagtuagsa ang tanang mga buang
hadlok nga madakpan.

nahimo kang tawo
sa dihang iyang gihikap ang imong dughan
gihapuhap ang imong buhok
gihagkan ang imong ngabil

nailhan mo ang kaanyag sa bulan
ug ang mga bitoon kalit lang
morag nahakop sa imong palad
apan nausob ang tanan
sa dihang mibiya siya nga walay pananghid
abi mo ug mobalik ang imong pagkabato
abi mog mabuak ka
mobalik pagkatigpod hangtod nga
mahimong abog
apan wala
ang tawo kabalong magpadayon
kabalong mobiya sa naandan
gihikap mo ang imong kaugalingon
gihapuhap mo ang imong buhok
giawitan mo ang bulan
gihipos mo gihapon ang mga bitoon
sa imong panumduman
ug kon mobalik pa man gani siya
kon kanus-a pa
palabyon mo lang siya
ug dili ka na
mangutana pa kon naunsa siya
og kon asa siya
padulong
ang tawo dali lang makalimot
di na gani ka kahinumdom kon kinsay iyang ngalan.

ang mga batong buhi
nanagan palayo sa dagat
nanaka, nanaka sila
subay sa suba paingon
sa bukid

ug sila nahimong mga
bukid
nga sa ilang kahabog
sa aping sa langit
mihalok

MUSA MISTIKA


salamat sa imong
pagpahawa akong
musa mistika

karon makaginhawa
na ang akong baga
panahon na sa pagpahulay
balik na ko sa akong balay.

ang naay piso sa ilok palihog
iisa ang tuong kamot dungan sa imong wala nga kamot
itagbo kini silang duha sa ibabaw sa imong ulo
lima ka tudlo isul-ot sa laing lima ka tudlo
ilubid nga morag shakoy
dayon lakaw sa unahan pangitaa ang pangpang
sulayi ug ambak dayon balik diri sa atong
tagboanan
sultihi dayon ko kon ang pangpang habog ba ug unya
ang imong lagapak
kusog ba usab.

ingon ka kugihan ka
ingon ka ganahan ka
ingon ka sayo kang momata
dayon gakubikubi ka unya
siging ratsada

haskang liboga nako ani oi
wa man lagi kay agi?
unya ako pay imong giatubang ug
girapidog, "nganong magbuot man ka?"
bakakon ka diay
asa man gayod diay ang agianan
nianang tinood nga kugihan?
tagai daw ko ug mapa.

kadtong gihikawan sa tanan
taas pang disyerto ang imong
lakwan
dala nimo ang imong kinumo nga
walay sulod
ang matag gabii gahulma ug
pala
nga siging gaugkat sa balas
nagpanikad kon kinsay sunod
ilubong.

kon ganahan ka gayod
kon gugma na ang nagtuklod
ug nag-agak
kon mihatag ka sa tanan
sa tanan sa imong kaugalingon
nga wala ug dili maningil kon unsa
ang sukli

sayon na lang dayon ang tanan
ug silang naglantaw kanimo moingon
"pwerting lisoda, ana!"
unya makapangutana
"giunsa man kaha ni niya?"
unya ang imong tubag
mao ara gihapong tubaga
gikan kaniadto ug hangtod
na karon,
"wala lang
ambot kaha"

ANG BALAK NGA WA HIKALIMTI NI NENEN
i
may unggoy kong gamay
gisugo kog kamunggay
bantog rang naglikay likay
nakakita diay'g sumbagay

ii
may unggoy kong dako
gisugo kog tabako
bantog rang nag dukoduko
nakakita diay'g usa ka dako

LAWAS LANG (ayaw na ang gugma)


kalit ang panghitabo
kining kihat sa mata usahay
moabot sa
dili unta angayan

sama sa atong pakighinabi
sa makadyot lamang
unya miabot na man hinoon
kitang duha
sud sa usa ka lawak nga
baratohon
nga ang mga kurtina abogon
unya ang bintana
guba
gisirad-an mo ang pultahan
unya gihubo ko ang akong
karsones, ang polo shirt,
ang medyas,
ang kataposang tabon
ikaw pod nahisama kanako
diha sa pagpangabri sa
mga nanirado kanato
puti, itom, balhiboon, hamis,
nipis, baga, galamog ang
gibati
nagkadohinog ang
mga singot
nagpangurog ang mga
unod
way mayubit
apan nabungat
ang langit
gihimas mo ako sa imong
mga kamot unya nangutana
ka kon unsa ba kining
nahitabo kanato
misulay pagbungat ang
imong baba nianang pulong
nga gugma
apan akong gibara ang imong
pagyubit
akong gitiklop ang imong
ngabil
dili ko gahan nga
duna akoy
madungog bahin niini
kay sa imo pa lang kamot
nga nagmapa kanako
atua na ang tanang mga
pagpamakak

ang paglatay sa alambri tabok sa pikas pangpang
ang pagsayaw sa kinatumyan sa bukid ug balik padulhog
dagan dagan sa ibabaw sa mga siak nga bato sa kilid sa
bungtod

dali lang kining buhaton
gani sayon ra man
nga morag gaduladula ka lang
sa imong kinabuhi
kana,
kay dili ka man god hadlok mamatay.

human sa iyang retirement ang dalagang ulay nga maestra
nagpahimo ug gamay nga balay sa kilid sa bungtod unya
sa iyang damgo nga aduna usab siya'y gamay nga hardin
sa kabulakan nanuhol siyag usa ka gwapong hardinero nga
maoy moatiman sa iyang tanom

(nangutana ang hardinero kon pila ang iyang retirement ug
iyang pension matag bulan, unya pagkahibalo niya niini,
gibati niya ang kamingaw, dayon ug bungat---)
"gihigugma ko ikaw. Panggaon ko ikaw sa tibouk kong kinabuhi.
O maanyag nga rosa! Ikaw na, ikaw na gayod ang akong gugma"

maoy ingon ni leoncio
sulbad na ang katunga sa imong suliran
kon ang imong gamiton mao ang imong kaugalingong pinulungan.

REGRESYON


kanang mobalik ka
unya ang imong mga ka berks
kaniadto
nagbitbit na sa ilang mga
apo

unya kadtong gitanom mong
lomboy
haskang pamunga
nangahinog dayon nangahulog
sa tiilan
nangalata
ug way bisag usa ka bata
nga mipunit kay
wa nay lami.

ang di makuha sa kasingkasing
mahimong kuhaon kini sa baba
ang di makuha sa baba
kuhaon kini sa kamot

ang di makuha sa kamot
anaa ang tiil ug ang di makuha sa tiil
o sa ubang pang parti sa atong kalawasan
nan, kuhaon kini sa uban.

actually
wa ta kabalo ug unsa
apan naa
ang importante
naa

bation man lang
na
nindot na siya
naa ra sa sud
kabuthonon apan
imong gipugngan
apan kon makabuto
kwidaw
mobahagay
morag botelya sa coke
nga imong giuyog
disir giabrihan
daghang bula
unya maalaan kang
buang
unya sila nanilap
sa imong giusikan
labaw pa's
irong buang.

unot-unot sa hadlok-hadlok

ayaw ko hadloka
diha sa ngitngit

lami ra ba nang
hadlokon ko
unya pahadlok
hadlok pud kuno
aron lang dayon
kagakos nimo

ang mong dila
usa ka gilok kaayo
nga hunghong
sa akong dunggan

unya ang akong dunggan
misukol
sama sa pagpamukol
ni Lumeng
mikitiw
mitaliwtiw
morag si Itiw
miabri dayon
mibukad
ikaw sab giganaha"g
hunghong
ug ako sab
wa magtingog
samtang
imong
siging
gikolitog

ang mga gawasnon
kay lagi malipayon
di na na kabantay kon
kapila magawsan.

ang mga batong buhi
nanagan palayo sa dagat
nanaka, nanaka sila
subay sa suba paingon
sa bukid

ug sila nahimong mga
bukid
nga sa ilang kahabog
sa aping sa langit
mihalok

TROIS


tulo ka
pasahero sa dili kaayo dako nga habalhabal

gamay lang ang lingkoranan kay lagi
dili baya kaayo dako ang habalhabal
ikaw ang tunga
unya ang imoha dap-ig kaayo sa gadala sa manobela
sa gamayng motor
ang ulahi durong kapyot
hawid sa unahan didto sa kinatumyan
dap-ig sab kaayo
aron di mahulog
ang kainit gibati
dayon dunay migahi.

ang tanan naay sekretong
tinipigan
sama sa dagat nga nagtipig
usab ug
mga isda sa iyang kabatoan

sa mga kahoy sa ilang edad
sud sa ilang mga panit
sa mga bitoon diha sa tumang
kahayag diha sa adlaw
sama sa mga kagabhion nga
nagtipig sa mga tawong wa katulog
nagbalibali diha sa katre
nga nangita usab ug laing wa
katulog
silang tanan nangitag tupad
mga kauban
mga hungihong nga unta
adunay mahibalag
pati gani ang dugdog
nangita mag kadulog

nagpingki ang mga kawayan
niining away nga balaan
silong sa dili kaayo dan-ag nga bulan
ang usa gitalikdan

sa tumang kalipay
nahulog ang ulan.

PANGUTANA SA USA KA TASA NGA KAPE

ang init
pabugnawon
unya kon bugnaw
na painiton
unsa ba ang
saktong higayon
nga ikaw ako
na unyang imnon?

ang tiki ug ang langaw

kita kaayo nako ang tiki nga migukod sa langaw
nga mitugdong sa bintana nga samin diri sa akong lawak basahanan

kita kaayo nako ang iyang kaabtik,
walay kamot nga gigamit,
baba lang, ug dila ang iyang dag-anan
ug ang langaw gitulon human nasakpan

ug ang iyang tiyang  mibutirik
dayon niyag balik diha  sa pagpatikigtikig

nagpaabot napod sa sunod nga matukob
asa kaha ang iyang busganan kutob?

kay dinhing dapita, dili kita ang matood.

sa dalan
mihangyo ka nga mohunong una
sa kahaponon nangutana: "unsa ba'y tan-aw mo kanako?
mora ba akong unggoy? dili kaha ako ungo?
dili mo kaha ako tawgon ug kulungo?"

abi kog unsa'y atong gihunungan
mga pangutana man lang diay gihapon

dili angayan hunungan ang mga pangutana
bisan gani ang akong mahimong tubag unya dili kana
angayan nga hunongan

magdali kita, layo pa kaayo ang atong panaw
ug ning dapita dili pa angayan ang mga pangutana ug ang mga tubag

gitudlo ko ang layong kahayag sa akong simod,
gihawiran ko ang imong abaga, ang imong nawong akong gitumong paingon didto,

"tua ra didto ang atong adtoan, tala na, ayaw na ug hunong"
kon mahimo magpadayon kiti niining atong lakaw, kon mahimo atong daganon,

kay dinhing dapita, dili kita ang matood.

ang perlas sa akong taklubo

kon manginhas ka
ayaw sa mabaw
kinhason ra ang imong
makawkaw

ali diri sa lalom
salom, salom, salom pa gayod
naa ang dako kaayong
taklubo

muokab, mosira, moukab,
lantawa lang ang iyang
perlas

ayaw kuhaa, ayaw gayod ug
sulay ug kuha,

lantawa lang, ayawg kisaw,
ayawg ikiwil ang imong mga tiil

lantawa lang
ako lang kana, ako  lang gayod kana

dili mo mabati kon unsa kahapdos
ang kahapdos

busa paningkamoti ayaw intawon
ug pagkuha sa  perlas

mubong sugilanon sa taas nga kahidlaw

mubong sugilanon sa taas nga kahidlaw

kapeng hagbay nabugnaw

ug gihulmigas nga plato

sa kamoteng gibarbekyo 

samtang sa pagkatagpilaw 

sa imong dughan gahaylo

ang bilangkad sa libro

-- RIC S. BASTASA

tulo ka sulat sa akong minahal

tulo ka sulat sa akong minahal

ang unang sulat mao gayod ang alang kang nanay:

"nay dia na ko diri
dako ang unibersidad
ako ray lahi ug pantalon
ang akong polo shirt
daan, ang akong kauban
sa dorm di pa kaayo nako
sinati, apan
lahi ko nila nay.
apan ayaw kabalaka
ako jud sundon ang
imong tanang tambag,
magtoon kog ayo nay
di ko magbarkada
simba ko matag adlaw
dayon di ko mangitag
away.

musta namo diha nay?
si tatay mouli pa ba
gihapon nga hubog?
naayo na ba ang petromax?
ang kabaw wa ba maniwang?
daghan pa ba gihapon ug
itlog ang mga bebe?
si peping midayon ba
sa zamboanga?
ayaw palabi ug bilar nay,
makadaot kana sa imong
lawas
ayaw lang daghana ug
bingka kay di man sab
na mahalin tanan

nay gimingaw na ko
nimo
apan antoson ko ang
tanan."

ang ikaduhang sulat
mao sa akong kaugalingon
nga akong kanunayng
gitago sa akong maleta
ug basahon matag
buntag human nakog
simba, dayon nakog
pamahaw.

ang ikatulong sulat
alang kanimo
apan nakahukom ko
nga dili ko na lang
una kini ipadala
kanimo.

gipaabot ko lang
ang saktong higayon
apan

dugay pa gayod kana
kaayo.

kanus-a pa kaha

kanus-a pa kaha

karon dili lang kahayag ang
akong gikinanhanglan

dili kaayo lisog pangitaon
ang kahayag
kay bisan ug sa siradong
lawak
maaninag pa man gihapon
ang kahayag
sama diha sa buslot nga
bongbong
ug pati na gani sa buslot
nga atop
ning atong gipuy-an

mas galisod ako ug pangita
sa kainit

kadtong kainit sa imong dughan
sa imong paa
sa imog bukton
sa imong halok

gihandom ko gihapon kini
diha sa pag-iyagak
sa uway nga katre

dugay na kaayo kadto
panumduman na lang
pagkahuman diha sa paghandom
naghatag kadto kanako ug
daghang kasakit
lalom kaayong kamingaw
nga mikilitog sa akong
kasingkasing

mahimong makalimtan
mahimo man
apan lami gayod gihapong
balik-balikan

kanus-a pa kaha? kanus-a
pa kaha?

nganong nagsulat ba ako?

nganong nagsulat ba ako?

dili ko unta isulti ang tubag
basin masuko ka kanako

kining tubaga mahimong
binulok nga tubag mahimong
tubag sa usa ka laog
sa usa ka tawong kaugalingon
lamang ang
gihunahuna, apan mao gayod

kini ang tinood. Nagsulat ako sa
akong kaugalingon lamang. Wala
nako handoma nga mausab ang
dagan sa panahon,
wala nako handoma nga mabalik
pa kanato ang mga sapa nga
hagbay rang naughan sa
tubig tang gipangita
wala na nako hunahunaa pa nga
kadtong mga dalan kaniadto nga
atong laktoranan
makit-an pa nato pagbalik

hapit na maupos ang akong kandila
busa ang akong kaugalingon lamang
ang akong gisulatan

kabahin kini sa unta akong gibuhat,
sa unta akong gilikayan, sa unta akong
gipangga ug gihigugma,
kabahin kini sa mga nawala na kanako
og sa gusto ko pa untang magpabilin
kon mausob pa man ugaling ang
dagan sa akong kapalaran

dili ko na usbon ang imong kalibotan
ang gustong mahitabo sa daghang katawhan

human sa pagkumot sa papel
gusto ko na lang kining ilabay
wala na nako handoma ang pagbasa
kon unsa gayod ang imong gisulat
didto,

ako, ako lamang, ug ako lamang gayod
ang mga pulong nga gusto nakong litokon
pagkahuman

sa dihang mapalong na ang kandila
kasabot ako sa pag-abot sa kangitngit

kon aduna man ang kahayag
o ang bag-ong dalan, aduna pa kaha
ako'y gahum sa pagsulat bahin kanako?

busa, karon, karon, isulat ko na ang
akong kaugalingon,
ang iyang taliabot nga kataposan
ang tingog sa iyang kataposang pagtinga
dayon unya nakong hipos sa akong kamot
sa ibabaw sa akong dughan.

ang gamayng bata sa kasina
milipot sa dako niyang kontra
gisuntok ang tangkugo 
ug dayon natumba ug samtang
natumba
gikabay-an ang dakog nawong
girumbo ug suntok
hangtod nagisi ang ngabil
nabali ang kilay
nalangkat ang ngipon
ug dayon ang gamayng bata
midagan paingon sa ila
gaiyak
kay kuno gidaog-daog
siya
gikulata, gitabangan,
dayog palaban sa
iyang amahan

ang iyang mga bakak
nanyagit sa iyang aping nga
bisag usa ka kawras
walay tabas