asa naman kaha?

ning ting-init ang mga langgam

wala nay luna sa tubig sa sapa.

ang mga humay giani na usab

og wala na usay sobra para kanila

ang mga uhay.

busa dayga ang batang nahigugma

kanila nga sa matag adlaw magbutang

og paya nga puno sa tubig sa silong

sa punoan sa bayabas unya pagkahuman

og lawog sa iyang duha ka iro magpabilin

kinig gamayng kan-on alang kanila.

bisan gani ang mga langgam sa langit

mora nama'g mga disipulo ni nietzche

(pwera buyag, pwera gaba) nangutana

naman kon asa  ang naghimo kanila.

ang batang walay buot nga makamaong

malooy wala 'sab nasayod.