kitang duha niining akong sulat alang kanimo

nagsulat ako
dili alang kanila
nagsulat ako
tungod ug alang
lang gayod kanimo

wala nako kini
gipalikoliko
aron unta dili
ka makaingon
kanako nga ikaw
nawala og unya
wala ka na makatultol
pagpauli balik
kanako

nagsulat ako
aron imo akong
masabtan

pasayloa apan
mogamit akog
mga tanghaga
aron ang makabasa
niini
maghatag og
kahulugan
diha sa ilang
nakita

masabtan mo kini
tungod kay sa makausa
nagkahimamat kitang duha
nagkakuyog
nagtinan-away diha sa
kahilom
samtang ang hangin
nagpakita kanato
sa mga labing mahinungdanon
tali sa pagpakabuhi

ang akong gihatag kanimo
akong gihunghong sa imong
dunggan
ang akong gipabati kanimo
mao lamang
ang akong palad
ang akong gisaad kanimo
mao lamang ang karon
nga wala mahimong ugma
og dili usab mahimong
kagahapon

sayod ka nga kitang
duha
lumalabay lamang
nahisama sa buwak
sa gumamela
nga usa lamang
ka adlaw ang
pagbuswak

sama sa alibangbang
nga ang kaanyag
anaa diha sa iyang
kagaan
sa iyang hamubong
kinabuhi

nasayod ka ba kon
unsa ang nahitabo
sa maong alibangbang?

sa kakusog sa hangin
naputol ang iyang duha
ka mga pako

ang iyang lawas
gibanlas sa lawod sa dagat
sama sa usa ka luha
nga nahug
sa init nga sabaw sa
lumi
nga atong gisaw-an
sa karaang
kan-anan