alang kang T. sa iyang JUNK CAFE

nasalaag ako didto
sa imong lugar
nagtindog kong walay
gihunahuna bisag 
gamay man lang,

ang akong gilingkoran
mao ang balaang silya
ni Cleopatra
(kawayan man to di ba?)

ang akong gipamintaan
mata ni Cassandra
(kadtong bintanang
payag?)

ang isda naglutaw sa
kilid sa bongbong 
( kristyano kadto
karaang gilutos sa
romano)

kining imong balay
(balay sa mga gilabayng
basura sa mga silingan)
apan ikaw, ang ulipon sa
arte, nangunot ang agtang,
daghang ulat ang kamot

pagkagamhanan mo,
bisag sa tinood lang
di ko motoo.