alang sa ganahang mosulod sa pultahan

ah mahimong moluhod ka sa
makadyot
moampo nga morag ampo-ampo

dili man lisod ang magpiko
sa tuhod
og nianang paghalok sa
imong duha ka 
palad

kausa lang,
ayaw og kaulaw

gikinahanglan man gayod
kini aron makasulod ka sa usa ka pultahan
diin silang tanan
nangagi

kadtong tamsi, kadtong kulasisi,
kadtong unggoy

kadtong pak-an nga isda
kadtong tawong upat og nawong
kadtong babayeng tuloy pusod
kadtong lalaking ang iyang mga tudlo
morag lastiko nga
mainat-inat

pagkahuman
balik ka na dayon sa tinood mong
lawas
sa imong gahing ulo
sa imong talinis nga tinan-awan
sa imong utok nga tore
sa imong kamot nga kanunayng
nagtarong diha sa kinumo


kausa lang
luhod, tak-om ang baba,
piko ang liog
hulog ang suwang
bali ang kilay


pagkahuman
ikaw na ang hari dinhis
ilang lasang

ikaw na ang magbuot kon asa nimo
ibutang ang mga bungtod
og sapa

apan kwidaw ka
kalma lang
dili gihapon nimo kapugngan
ang pagsalop sa adlaw
og ang paglatag niini sa habol sa
kangitngit
diha sa tugnaw kaayong higdaanan