gugma sa duha ka kahoy ( alang kang J ug J)

kinse ka tuig na diay
kining duha ka kahoy nga
nag-atbang sa karsada

nag-uban apan wala magkuyog
kanunayng lagyo ang ilang kahimtang

kinse ka tuig na silang nagtinutokay
og maingon tang wala'y nahitabo gawas
lamang sa ilang kanunayng pagsaad

kabahin nianang mga ugma puhon
kon kitang mga kahoy tugtan na nilang
makalakaw pinaagi sa atong mga gamot
nga ugma puhon mahimong mga
tiil...

sa hulaw ang ilang mga dahon mangahulog
sahay magkatagbo diha sa hangin
morag mga alibangbang nga wa matuyo
ang panaghalok sa ilang mga pako

dayon nilang kahulog sa yuta dayon paliron
na usab sa hangin
paingon ngadto sa layo hangtod wala ka
nay madungog wala ka nay makita
bahin kanila