kay dili ka man nila madawat

lahi pod to sila.
apil man ta kas
ilang panagkuyog
paingon sa
plaza
apan sa dugay
nabantayan nimo
nga sila sila lang
ang nagbahin
sa ilang mga
sugilanon

kon mosagbat
ka dayog senyas
sa usa
kuyugan sa
pagbutang sa
iyang tudlo diha
sa iyang ngabil

"paghilom
ayaw og apil-apil"
diha sa iyang
gasimag mga 
mata

sahay makalagot
hunahunaon kining
tawong
ipamugos ang
iyang kaugalingon
sa mga
walay batasan

palayo
pangitaa ang luna
diin ikaw
ilang kakuyog

diin ang imong
tingog 
awit
diin ang imong
lakat
usa ka sayaw

di ba ingon
nila kon dili 
ka pasak-on sa
maong balay
og wala ka
imbitaha sa
panihapon,

"itaktak ang
mga abog diha
sa imong
tiil
ayaw na og
tingog
pahawa"