paghinuklog

sa hapon
didto sa Manawan
sa may hunasan

ang kagahapon
kanunayng mokuyog sa panon sa pagsalop sa adlaw
diha sa tubig sa suba nga karon mokuyog na sa sulog paingon sa dagat

ang baba sa bukana dili sabaan
kanunayng kining midawat sa pagbiya sa katab-ang aron mopatigbabaw na gayod ang kaasgad

sa taob nga dagat
og dinhi ako maghinuklog sa mga lumalabay, ug sa mga nanglabay

hangtod nga mapapas na ang mga anino inig-abot na sa tumang kangitngit
nga dili baya usab molahotay kay oran-oran moabot na man usab ang mga pungpong nga mga bitoon

magdayandayan sa bayabas nga bulan
dayon mobanlas na usab ang kahayag isip sukli sa kangitngit nga gitangag sa adlaw nga milalin
ngadto sa lawak nga pahulayan

usa kini ka panaw diha sa dakong tuyok-tuyok sa atong kinabuhi
aron puhon mahibalag ang wala pa mahikap sa atong mga kamot
 apan sa kanunay gibati na sud sa kasingkasing