panaad

Samtang namahaw
ta naghisgot ka sa 
pagtubo og kabag-ohan

" kadtong gihatod-hatod
sa kindergarten didto ka
Liklik, abi mo, doktora na
diay" maoy sinugdanan 
nimo,

ug mipadayon ka, " kadtong
batang sipat, kaslonon na
usab, sundalo na siya
og midako baya ang lawas
nga unta apyogon man
kadto",

sa hilom (atong gidawat ang
atong kapalaran) kay dinhing
lugara, dinhi sa atong 
kan-anan, walay nabag-o,
ang mga tasa, ang kutsara,
ang mga lingkoranan
wala gayod madungagi,

og sa atong buhok nga gitina,
sa atong mga kunot nga gipapas
sa kabag-ohan sa midisina,

gihaylo nato ang mga edad,
gipasaylo nato ang mga posibilidad,
gipahunong nato ang kasagarang
dagan sa kalendaryo pinaagi sa
kanunay natong pagsaad nga
kita ra gayong duha gihapon
hangton sa atong pagkawala.