gipabuto ko kining pagbati nga kanako nakapalugti.

kay ania ka man gihapon sa
sulod sa akong batikolon
ako kang pagawson sa akong
gininhawa

unsaon ko kaha kini ?
wala na akoy labot kanimo
nahuman na ang akong
tuyo busa pagawson ko na
ikaw gikan sa akong
galamhan

gipabuto ko kining pagbati
nga kanako nakapalugti.

karon nga nakagawas ka na
mahimo na akong moginhawa
lalom nga ginhawa
sama sa usa ka paghabwa.

sama sa usa ka manatad
nga nasulod sa hawla
gibuhian ta ka
gibalik sa imong kaidlas
og taranta.

karon nga wala ka na kanako
ako na lamang sa akong pagkaako
nahuwasan, gawasnon,
dili man gani kaayo malipayon
apan halangdon.