hunahunaa nga kon unsa ang balaod sa kaldero mao gayod usab ang balaod sa kalayo

sa dihang nagtinga
na sila
nakita nimo ang
ilang kahadlok
pagsulod sa laing
pultahan
ang ilang mga
mata nga bisag
gilawalawaan na
nagapasopaso sa
kabalaka sulod
sa ilang
mga kalimutaw

miwala ka nga morag
imong gipikas ang
dakong dagat
hangtod nga nakita
ang mga batong
bukod sulod
sa tiyan sa kinaiyahan

"ayaw kamo kahadlok.
sa unahan anaa na ang
inyong mga tagbo
sunod lang dayon kamo"
og mipiyong ang ilang
mga mata
nangahulog ang ilang
mga pilok

miabot na nga ikaw
na usab ang
gilatid nga mosunod

nahadlok ka na ba?


"ayaw kamo kahadlok.
sa unahan anaa na ang
motagbo kanimo
nga nagdalag iwag

sunod lang dayon "


og mipiyong ang imong
mga mata
nangahulog ang imong
mga pilok


hunahunaa nga kon unsa
ang balaod sa
kaldero
mao gayod usab ang
balaod sa kalayo