sa akong
dakong bakak
nasalbar ko
ang 

tinood, sa akong
gisigig pamakak wala 
mahulog ang tinood busa
wala kini mabuak

nagpabilin kining 
tibuok, walay liki
dili kimpang,
walay garas,

nagpabilin kining 
ania kanako, wala mawala
wala mausik

sa akong pagpamakak
kanimo
naluwas ko ang unta
malumos na nga
kamatooran nga sa dugayng
katuigan
ato gayong giampingan

busa dili ako mangayo kanimo
og pasaylo

kadtong wala nimo mahibaw-i
magpabiling bahandi alang kanako
kadtong wala makapasakit kanimo
magpabiling kalipay alang kanako

ugma silhigan ko na usab
ang natarang napuno sa mga dahon
sa namatay nga kahoy