pagsulod nimo sa lawak
sugaton ka sa baho sa mga iro

hinoon wala na sila
apan gibinlan ka nila sa mga
nagkatag nga kagubot sa
mga bulingon nga pantalon

nagpasad na usab ang karapata
sa kilid sa bongbong nga
mikamang paingon sa kisame

abi mo ug mga sulom
abi mo nga kini sila molabay lang
aron magdula ngadto sa pansayan

ikaw ang tawong dili makaantos
sa kagubot
dili nimo malikayan ang
pagsugod na usab

makamao ka sa kinabuhi
gipilo mo ang mga habol og
giuli mo sa ilang lugar ang
mga ponda diha sa mga
alugnan
gilukot mog balik ang
banig

gisibog mo ang katre sa kilid
sa pultahan
gisegurado mo nga kini dili
uyon sa bentana

karong adlawa hapsayon mo ang
mga nahisalaag
wala na ang mga nagpasad sa salog
unya sa kataposan ablihan mo
ang bentana atubangan sa dagat
aron makasulod na ug balik
ang asgad nga hangin

human niining tanan molingkod
ka makadyot sa lingkoranan
aron pagpamati sa kahilom og
kahapsay

ang kataposan nimong buhaton
sama sa naandan
mao na dayon ang pagbiya

kinsang panaw ba ang mahuman?
kinsang sinugdanan ba ang dili balikan?