ang kabahin ni tatay niadtong giguba ang among balay nga karaan

samtang naglala si tatay
sa banig nga buli

kalit nga miulan sa
among baryo sa Olingan

ugma gub-on na kining
karaang balay namo

alisdan na ang atop nga nipa
sa coloroof 
azul ang gipili ni nanay

ang mga bongbong nga 
tibook tugas
alisdan na usab 
sa konretong mga haligi
ang mga bentana nga kahoy
mahimo na nga mga samin

mokuyog man god kuno
kami sa sulog sa kabag-ohan
aron sa mga silingan
dili na malibakan

dili maayo ang adlaw ni
tatay karon
og miduyog ang panahon

miulan, kusog kaayo
walay tingog tingog ang tatay
kong tigulang

ambot mora man siyag
namati sa subo nga pag-awit
sa atop nga nipa