didto sa lasang usa lang ang imong buhaton: ang walay paghunong sa paglakaw

gisugdan namo ang
paglakaw sa lasang
didto sa Cogon

alas dies sa buntag

wala namo kaayo
mabasa ang mapa
busa gisubay lang
namo ang dalan 
hangtod nga miabot
kami sa usa ka sanga

asa man kaha ang
saktong liko aron
moabot kami sa
among kapaulian?

mihukom kita nga
kining dapit sa
wala busa gibiyaan
nato ang dapit sa too.

alas dose na sa udto
wala kitay dala nga
tubig og pagkaon
gibati na ang kagutom

miabot kita sa punto
nga bisan wala kita
masayod kon asa na
kita magpadayon 
gihapon kita gihapon
sa paglakaw sa 
paglaom nga unta
maabtan na nato ang
kataposan ning 
paglakaw

madungog nato ang
kalanggaman
ang hangin ang
kanaas sa mga
sagbot nga uga
og sa mga dahon
sa kakahoyan

ang atong makita
mao lamang ang
dalan og ang mga
habog nga kahoy

kapoy na kaayo ang
atong mga tiil
gipaningot na pag-ayo
ang atong mga
kalawasan

apan usa lang gayod
ang atong 
gibuhat ang pagpadayon
og lakaw
kay unsa may atong
mabuhat diha
sa paghunong

alas dos na sa hapon

hangtod nga
nadungog nato ang
tingog sa tawo nga
nakatudlo kanato
kon asa ang
agianan paingon
sa gawas ning
lasang nga
atong tinuyoan

alas dos kwarenta

nakita na nato ang
karsada
sa atong kaluwasan

balik sa syudad
sa Dipolog
gisulayan ko 
paghunahuna ang
akong
nakat-onan

ikaw sa imong
kakapoy 
wala na motingog
imong gipiyong ang
imong mga mata
nga sa akong 
pamasin
nanaginot ka kaha
sa pagpunit sa
mga damgo nga
unta kanimo
karon makahupay?