mensahe sa mga umaabot

gisulayan nako pagtudlo
kaninyo sa saktong buhaton

niadtong adlawa migikan
kitag sayo sa Milad
aron atong handomon ang
mga gihatag og gibilin kanato
sa atong mga katigulangan

yano lang natong gilakaw ang
dalan paingon sa suba
sa ilalom sa layog na kaayo
nga mga kalubihan nga sa akong
tan-aw angayan na gayod nga
hulipan

nindot ang maong suba nga 
ginganlan nilang Ilihan
dili lalom, dagkong bato nga
gilumutan na sa kadanlog
gani hapit man ako mahayang

aron dili mahayang
gikamang ko ang tubig nga mora
akog nangamuyo sa iyang sulog
misalom ko dayon aron di mahutdan
sa ginhaw o hangin
ako mitunga milingkog sa bato
ug namati sa akong palibot

anaa ang mga huni sa kalanggaman
nga sa atong kaidlas usab kanila
dili na nato mahinumduman pag-usab
ang ilang mga ngalan

anaa ang awit sa suba nga kon
ayohon mo gayod pagpamati mora
kinig nagpanawag kanunay kanato
aron himamaton pag-ayo

ingon si papa kaniadto ang mga dagkong
bato dinhi usahay moabot dayon sa
paglabay sa panahon mangawala kay
matod pa niya motultol kinig balik
sa sabakan sa kabungtoran diin
sila mobalik

mamati unta kita og balik sa huni
sa kalanggaman sa awit sa suba og
sama sa mga dagkong bato balikan ta
ang sabakan sa mga karaan nga
sa kanunay miyukbo sa mga karaang
kahoy sa lasang sa kagamhanan sa mga
kabungtoran diha sa ilang pagpakahilom
lamang.