mga kalantahon sa kalisod

ganihang kaadlawon
nagpahipi na usab ang
anino

kubol, mubo, batohon
ang lawas

nag-ukoy kon kanus-a
mogimaw ang lawas
sa aliwas

kon mabungat mo man
ugaling ang tinood
mosayaw ang anino
diha sa pagbugal-bugal

apan makamao ang bakak
sa pagpalig-on sa iyang mga
unod ug bukog

magpabilin kang anino
nga magpahipi sa bungtod
kay ang nawong usa ka palasyo
nga taas kaayo

ang tulay paingon sa sulod
adunay dakong mangtas nga
mokaon og bata 
nga dili mo ikahalad tungod
sa gaba

ang mga mata sa kalibotan
magpabiling buta
ang iyang mga dalunggan
hagbay rang giabis

ang manananggot magpabiling
manananggot
magbaha ang tuba nga atong
ikahubog
unya kitang tanan malumos
sa kalami sa atong mga 
kalantahon sa atong kalisod