unsay inenglis sa kaldero?

kaganiha
nabatian nako ang pangutana sa usa ka
mubong babaye nga
dakog dughan, " unsa bay iningles
og kaldero?"

mitubag ang karaang kabit sa dato
sa among balangay
nga kulungon og buhok
baga og kilay
nga kanunayng nangandoy
nga unta ang iyang
bugtong nga anak nga babaye
nga atua
sa Singapore maminyo na unta
og hayahay nga insik,

"kettle" maoy iyang tubag
dalag kamenos sa
babayeng mubo, gisumpayan
pag, "pwede pod casserole"

"mao ba?" mitaas ang kilay
dayog patabang sa iyang tupad
nga taas og buhok nga babayeng
pution nga naka pink og blouse
unya pinapook nga
short nga klaro kaayo ang liki
sa iyang tunga,

" di ba god cooking pot?"
misagbat ang abat dayog katawa
nga basin og sayop siya
kay dili siya segurado sa gitudlo
sa iyang maestra nga mangkay
kaniadto
didto sa Salug National High
School,

"ah, cauldron ang saktong tubag
ana" misagbat ang bayot nga
stenographer
nga bisag gabaguod sa iyang
trabaho miapil-apil pa gyod
og arangkada anang iningles
sa kaldero

"hmm, depende", maoy sagbat
sa laing abat,
"buak ba o dili" nga mora bag
naa siyay laing tubag,

"unsay lung-agan, kamote ba
 o saging", dugang pa niya
"kalderong karaan og
bag-o"

kaldero ba sa gasul
o sa kahol
sa mga dato ba o
pobre,

mausob ang inenglis
sa kaldero depende sa imong
kahimtang sa katilingban

kon duna pa bay
lung-agon o wala na
kon gidala ba kini sa MILF
o sa mga NPA
kon kinsa ang galuto niini
basin military

o basin kadtong naalaan
nga tigtugway og kabaw
didto sa suba nga napusilan
kay abig DPA,

Ah, dakong awayanan pa kon
unsa gayod ang iningles sa
kaldero labi na og mag-apil
apil pa ang mga amerkanong
atik sa atong
gikasuk-ang mga insik.