kataposang panihapon

nabati nako ang
kausbanan sa dihang dili na nako
masulti ang ako
untang isulti kanimo

dunay pulong nga mogawas sa
akong baba
morag mga hulmigas nga mamaak
apan akong
gipang-irok hinoon makamao kong
magmadyik
gihimo ko kining mga alibangbang
unya giganahan
kang naglantaw gani nahimo pa man
kining korona
sa imong ulo

sa dihang nangaon na kita gusto unta
nakong patingugon ang paghigop sa 
sabaw
apan mora na man kog maulaw nimo
dili sama kaniadto nga 
nangatawa pa gani tang duha
dungag pakusog sa tingog anang
paghigop mga mora tag
mga insik sa sine ni jacky chan


lahi na man
dili na ako ako
og ikaw dili na usab ikaw

maong nakahukom ko sa dihang
mibabay na ko nimo sa akong
pagsakay aron  makauli na kos amo

nga kadto ug kadto na
lang gayod ang atong
kataposang panihapon.