bisag patay na ang kontra

i

ang mga
dili makiangayon nga
panghitabo
ang dili nauyon sa
kinaiyahan

ii

dunay tawo nga gustong
mosipa sa makililimos kay
kuno giilad siya
sa kinyentos pesos

dunay gamhanan nga
wa kasabot kon nganong
angayan unta nga ang
bugas ihatag na sa mga
walay gikaon kay namad-an
na ang ilang mga
basakan

dunay makagagahum nga nangayo
kon unsang partido ka sa
pulitika aron ihatag ang
tabang human sa dakong
unos

dakong sayop
apan bisan gamayng hunahuna
nga basin nasipyat lang
wala gayod

bisag upaton pa ang mata
di gyod kakita
bisag unumon pa ang mga
dunggan
di jud kadungog
bisag padak-an pa ang utok
nga morag banga
nganong di gayod kasabot

kon gipadak-an lang unta
ang kasing-kasing
basin anaa ra unta ang kalooy
bisag wala pa ang gugma

iii

diha sa sumbagay
ang kanunayng pangutana
mao lang gihapon
"kinsay gauna-una ninyong 
duha?"

bisag patay na ang kontra.