pamalihog sa mga bato

sayong mumata
mamubo sa tanom
alas 4 pa sa kaadlawon kay kusog pa ang tubig,

tak-ang ang nilung-ag, init og tubig, pamalong sa suga sa gawas,
inom og kape, gawas sa balay, sirad-an ang gate kuyog ang tulo ka iro

walking mga usa ka oras, timing alas sais na balik sa balay, ukab sa computer
sulat, basa, dili kalimtan ang balak karong adlawa nga kagabii pa nga gihulma sa damgo,

dili tanan mahinumduman, dunay damgo nga mitabok ka sa tulay unya mibaha dayon
nawala ang tulay sa kalalom sa tubig, dunay laing damgo nga migawas ka sa balay unya
ang balay nawala,

sigi gyod balik-balik kanang damgo  nga di ka na makamao kon unsaon pagpauli, hangtod karon
sige kang makulbaan kon unsa gayod kaha ang ipasabot sa maong pahimangno,

paspas gayod ang oras, morag sigi kang kabiyaan, molakaw na unta kamo andam na ang
sakyanan og ang imong driver apan mao na usab ang higayon nga ikaw kalibangon, dili ra ba
sab ka kabuot kon kanus-a mohaw-as ang tiyan ang iyang hugaw, kon kanus-a ang utong mopanganga
sa imong kinot, duna gyoy panahon ang matag panghitabo nga dili nimo mapugos mora bag
apil ang tae dunay kaugalingong panghunahuna maong sa dihang nakapanghugas ka na,
nakasuot na sa karsones, ug andam nga nga mogawas,

nahunahunaan mo kon basin dili ka na kabalik, unya ang mga kahoy ang mga kalsada
ang mga bato, nakaingon ka nga kini sila duna say ilang mga hunahuna kon unsa ang sunod
nga mahitabo

unya inig balik nimo gikan sa opisina molingkod ka sa ilalom sa mangga unya sulayan mo kini ug
pangutana sa pamasin nga kini motubag nimo, unya kon mahigala mo na kini, pangutan-on mo kon
unsa ang buot ipasabot sa imong mga damgo

kadtong inig lakaw nimo, nawala ang tulay, kadtong inig gawas nimo, nawala ang balay.
mamalihog ka sa mga bato nga unta mamati usab sila kanimo.