ang pinakaisog ug baho nga tabako nga naunag kahalin sa tindahan sa kinabuhi.

lahi baya kaniadto
sa among panahon sa buhi
pa si Lolo Enggoy,

sa bata pa kami 
ingon siya walay maglukdo
og kaldero nga tawo
kon mokaon ka aron mabuhi
kinahanglang makamao
ka moluto

gamay lang ang isugnod
igoigo lang gayod diha
sa inihap nga palito ug
sinukod nga gas alang sa
lampara

ginadili ang pagdula
alang lang kini sa mga tapolan
daghang buslot nga nga atop
ang angayan nga libwasan
manok nga dakpon
kanding nga pakan-on
kabaw nga itugway

naulaw ko ni Joker nga
ako unta ang kuyugon sa
pagpamista sa Lubing-ogis
nangasaba ang tiguwang
gisugdan ang sugilanon sa
tipasi ug sa mga uhay
sa ulan ug sa init
sa pagluhod unya sa
gisabwag nga monggos


kadto si Kadyo
nakat-on pagsukol
gikuha ang baston nga tugas
og gibunal sa likod sa
tiguwang
dayog layas gikan sa Basakan
ug wa na gayod idungog
kon asa na siya

si Ramon nagpalupad ug tabanog
sa dihang mikusog ang hangin
sa dihang miabot ang unos
kuyog sa kilat ug dalugdog


ako kadtong batang hilomon
nga mitago sa bukag
sa dihang nanglupad ang
mga baso, plato, kutsara ug
mga tinidor


karon wala koy ikasulti
kinsa kaha ang sakto.
apan mas nasayod si Ramon
mas dako ang iyang kahibawo
sa unos, sa dalugdog ug kilat
sa dihang milupad na gayod
ang iyang tabanog.

siya ang pinakaisog ug baho nga
tabako nga naunag kahalin
sa tindahan sa kinabuhi.