balak sa hunahuna

way raym
ang pagpatay

dili motugma ang
tingog sa
mga pulong

ang sinugdanan
dili katayming sa kataposan

walay masibo nga
pagbati
dili maayong timpla
ang kasuko
ang kalooy ang kataha
ang panimalos 
ang kaayo

walay ritmo ang
pagdumot
dili hapnig ang mga
salibotbot
anaay suyak ang dalan
anaay tunok sa
tutunlan

sa panahon sa pagkahulog
sa mga ulan
sa pagduyog sa kusog nga
hangin
sa paglugti diha sa kilat sa
samin
sa pagbuyong og kalilong
sa isog nga dalugdog

mangabuak ang bagolbagol
magpasad ang mga bildo
matunok ang matunok
dili na ilubong ang mga patay

ang suba sa kinabuhi lubog
ang langit dag-om
ang dagom putol ang 
sundang nga hait 
mangahabol....