balak sa pag-laom

dunay mga paghukom nga
dili na mobalik, gisunog nga balay,
tulay nga putol, ulan nga nahulog,
barkong nalunod, buak nga baso,
nalabay nga plato,

buskag nga bukag, buslot nga 
kaldero, gisi nga pantalon, 
miboto nga dinamita,

didto sa disyerto atua pa ang mga
damgo, sa unahan, sa unahan, lakat pa,
gikan dinhi ang mga balas hilom,
labi ang bulan sa kagabhion, 
natulog ang bitin, mibatog ang 
banog, way kisaw ang mga palmera,
abli ang ganghaan sa gipuy-an
ugma biyaan, dili angayan ang
kabug-at sa panaw,

sa unahan, sa unahan, nagmando
ang damgo, makita mo ang dagat,
mga barko, mga sakayan, ug mga
bata nga nagdula, awit sa mga balod,
paingon sa kabag-ohan.