kon nganong dili gayod mabungat....

dako ang akong
kakulangon aron makita
ang matahom

ambot nganong di ko
pa malitok ang akong nahikap
ang akong
nahapuhap ambot ug nganong

hangtod karon wala pa gihapon
nako mapagawas ang naa
sa akong kasingkasing, ngano

nga ang mga pulong idlas pa
gihapon bisan og unsaon bisan
og ako pa kining hangpon sama

sa usa ka biniyaan nimong 
panapton halok-halokan samtang
ako nag-inosara na lamang sa
akong mga kaguol, ambot

nga unta nasayran ko naman kon
asa ang kuwang kon asa ang
sobra kon unsa ang kulangan
kon unsa ang dugangan, 

wa lang gayod seguro ako makat-on
bisan pa kon kapila na mapandol,
o kaha ba dili ko lang gayod kini
mabungat diha kanimo sa kahadlok
nga sa kahait niini masamdan 
na usab ang imong kasingkasing

unya ang tanang kalibotan molantaw
kanako sa tumang pagbasol....