uhaw....

ulahi na
ang sayop nga pagpili

isugilon ko pa ba?

motaas na ang estorya
sa gugmang buta

ang bakol mopili sa
bakol
ang bao motago sa
bato

dili nako ipanugilon ang
sugilanon sa tumang
pagbasol

mobomirang lamang kini
kanako

sa samang higayon mokuskos
na usab ako sa ukelele nga bagol
motaghoy sa dahon
maghandom sa hangin sa hunghong
sa lawiswis kawayan

nganong kanunay ba gayod 
ang pagkaulahi sa sayop nga
pagpili?

lung-agon na karon nako
ang mga tipasi
unya ang akong sud-an
mao ang tunukon nga
bukog 
sa naandan na nga palotpot

di ko na ikaulaw ang balay
nga hirig
naanad na ako sa akong mubo
nga wala nga tiil

kaniadto sigi kong damgo
hangad sa langit basin naay
milagro
sigi nakong gigamit ang sanga
nga bali aron idrowing ang akong
nga pangandoy

haskang buanga gayod nako kabahin
niining mga butanga
haskang sayopa

karon nabrayt na ko sa mga damgong
balikwaot
sa mga pangandoy nga halhag
sa mga wala matuman nga karon akong
gigakos
gihambin nga morag mga tambis
sa akong duha ka mga kamot ug
bukton

mayra, mayra, maoy akong tubag
sa akong mga pangutana
maayong pagkapakog sa akong ulo
didto sa semento
nahigmata ko
nagdugo akong ilong
natilawan nako ang dugo

asgad nga may pagkapait
lami, gusto na gani nakong saloron sa
akong mga palad
aron imnon balik sa akong mga
tinae, hangtod kini ikalibang aron ka
malipay

"da! nakalibang na kini siya ug dugo,
hapit na nga mamatay!' 

gisabot ko ang imong kalipay,
uhaw ka sa asgad, uhaw sab kas kapait.