ang hukom

ang pagpatay kuno nahitabo sa atbang sa
balay ni duran
kilid sa kalsada paingon sa 
sergio osmeña

gitikbas daw ang biktima
kaduha, 
una dapit sa tangkugo
gidugangan dapit sa
agtang

hait ang maong sudang
taas, talinis,
apan bisan pa niana
sa dihang gitikbas na
ang  agtang, 
naputol pa man hinoon ang
katunga
nga morag bag sa bato
kini gitaga

wala motingog ang gisumbong
gusto na man ganing
sa salaos
moangkon

apan ang kahigayonan wala mitugot
nga ang kahilom maoy maghukom
sa aso nga kuno dili gayod
makumkom

asa ba diay ang balay ni duran?
"akong balay kana senyor"
asa man ang pagtikbas nahitabo?
"sa akong nataran
usa ka dupa gikan sa akong
pultahan"

pila diay sila nga miadto sa
balay ni duran?
"duha sila, anak ug amahan,
ang anak gadala ug armalite
ang amahan calibre 45
apan sa pagpusil nila kanako
dakong milagro nga 
wala may bisag usa nga
mibuto"

unsa man ang imong
gibuhat?
"akong gitikbas ang amahan
nga maoy hinungdan sa 
tanan"

unsa may imong gigamit?
"ang akong sundang
nga ilang siging 
pagahulman"