ang kalibotan ta

unsaon mo kaha paghikalimot
kadtong miabot nga gipangutana
kon kanus-a mopahawa?

kadtong imong naablihan nga
unta diay sumala sa ilang naandan
unta pagasirad-an?

unsaon mo kaha pagsabot ang
pagpasaylo diha sa nausob na nga
mga taliabot? 

nabali na ang inyong kalibotan
ang mikulob anaa nahayang
ang kaniadto naninghawak
anaa sa taliwala nagkamang

karon nga ikaw na ang hawak
unsa may imong buhaton sa mga
lapalapa? ayaw kalimot
ang sila kaniadto, kon dili ka
mag-amping, mamahimong 
ikaw na usab karon

ligid sa trak ang kalibotan
kanunay nagatuyoktuyok 
hangtod kini maigo sa lansang.